پلوامہ میں پی ڈی پی لیڈر کی دہشت گردانہ حملے میں موت
پلوامہ،24؍اپریل(ایس او نیوز؍آئی این ایس انڈیا)دہشت گرد انہ فائرنگ کے تبادلے میں زخمی ہوئے پی ڈی پی کے لیڈر عبدالغنی کی اسپتا ل میں موت ہو گئی ہے، وہ پی ڈی پی لیڈروں سے ملاقات کرنے سری نگر جا رہے تھے، اسی دوران ان کی گاڑی پر دہشت گردوں نے فائرنگ کردی تھی۔پیر کو جنوبی کشمیر کے پلوامہ ضلع کے روہمو گاؤں میں دہشت گردوں نے حملہ کر کے عبدالغنی پر فائرنگ کی تھی ، جس کے بعد انہیں اسپتال میں داخل کرایا گیا تھا۔قابلِ ذکرہے کہ گزشتہ دو ہفتوں میں جنوبی کشمیر میں پی ڈی پی لیڈر پر ہوا یہ تیسرا حملہ ہے۔واضح رہے کہ حال ہی میں دہشت گردوں نے راج پورہ علاقے کے قصبایر علاقے میں فائرنگ کی تھی،اس حملے میں 45سالہ پی ڈی پی کارکن بشیر احمد ڈار اور ان کے رشتہ دار الطاف احمد ڈار کو گولیاں لگی تھی، دونوں لوگوں کو شدید حالت میں پلوامہ اسپتا ل میں داخل کرایا گیا، بشیر کو ڈاکٹروں نے فورا مردہ قرار دے دیا تھا۔واضح رہے کہ گزشتہ کچھ عرصے سے وادی میں مسلسل کشیدگی جیسے حالات ہیں، حال ہی میں ہوئے سری نگر ضمنی انتخابات میں ووٹنگ کے دوران سیکورٹی فورسز کی فائرنگ میں 8شہری ہلاک ہو گئے تھے۔تشدد کی وجہ سے صرف 7.14فیصدپولنگ ہی ہو پائی تھی ۔اننت ناگ لوک سبھا سیٹ پر ضمنی انتخاب کو ٹالنا پڑا تھا۔اس دوران سوشل میڈیا پر ایک کے بعد ایک وائرل ہو رہے تشدد کے ویڈیو نے آگ میں گھی کا کام کیا۔سیکورٹی فورسز کے ذریعہ ایک نوجوان کو گاڑی سے باندھ کر گھمانے کے ویڈیو سے لوگوں میں شدید ناراضگی ہے، اس سے پہلے ایک سی آر پی ایف جوان کے ساتھ بدسلوکی کے ویڈیو سے خاصا ہنگامہ ہوا تھا۔ایک اور تازہ ویڈیو میں فوجیوں کو ایک نوجوان کو پیٹتے دکھایا گیاہے۔
