اودھم پور لوک سبھا سیٹ پر جتیندر سنگھ اور ڈوگرا مہاراجہ کے پوتے آمنے سامنے
کٹھوعہ(جموں و کشمیر)،26 مارچ (ایس او نیوز؍آئی این ایس انڈیا)جموں کشمیر کی اودھم پور۔ڈوگرا لوک سبھا سیٹ پر مرکزی وزیر جتیندر سنگھ کا براہ راست مقابلہ کانگریس امیدوار وکرم دتیہ سنگھ سے ہے جو پیشرو مہاراجہ ہری سنگھ کے پوتے ہیں۔انتخابی مہم کے دوران جتیندر سنگھ اپنے ترقی سے متعلق دعووں کا ذکر کرتے ہوئے پیشرو حکومتوں کو چیلنج دیتے ہیں کہ وہ ان کی حکومت کے کام کاج کے مقابلے گزشتہ ساڑھے چھ دہائیوں میں کئے گئے مبینہ ترقیاتی کاموں سے کریں۔نئی دہلی میں ایک بار پھر وزیر اعظم نریندر مودی کو لانے کے نام پر ووٹروں سے بی جے پی کو ووٹ دینے کی اپیل کر رہے سنگھ نے کہاکہ میں اپنے پانچ سال کی ترقی سے متعلق رپورٹ کارڈ کی بنیاد پر ووٹ مانگ رہا ہوں۔اس پارلیمانی حلقہ میں تاریخی ترقی ہوئی ہے۔گزشتہ پانچ سال میں یہاں نافذ بنیادی ڈھانچے کے منصوبوں کی فہرست طویل ہے۔سنگھ کو آخری ڈوگرا حکمران مہاراجہ ہری سنگھ کے پوتے، 54 سالہ وکرم دتیہ سنگھ براہ راست چیلنج کر رہے ہیں۔وکرم دتیہ کانگریس کے سینئر لیڈر کرن سنگھ کے بیٹے ہیں اور ان کی امیدواری کو نیشنل کانفرنس کی حمایت ہے۔محبوبہ مفتی کے زیرقیادت پی ڈی پی نے اس سیٹ پر کوئی امیدوار نہیں اتارا تاکہ سیکولر ووٹ بینک تقسیم نہ ہونے سکے۔ پارٹی ذرائع کا کہنا ہے کہ پی ڈی پی کے اس قدم سے وکرم دتیہ کو فائدہ ہو گا۔دریں اثنا ڈوگرا سوابھیمان تنظیم (ڈی ایس ایس )کے بانی اور سابق بی جے پی وزیر چودھری لال سنگھ بھی انتخابی میدان میں آواز بلند کررہے ہیں۔وہ 2009 میں اسی سیٹ سے جیتے تھے۔اس بار چودھری لال سنگھ کٹھوعہ ضلع میں ہندو ووٹ بینک میں نقب زنی کرسکتے ہیں۔