منگلورو16؍نومبر (ایس او نیوز) منگلورو سے راست دبئی کے لئے جانے والے مسافروں کے لئے ایک بری خبر یہ آرہی ہے کہ آئندہ ماہ یعنی 5دسمبرسے جیٹ ایئر ویز کی طرف سے راست دبئی کے لئے مخصوص روزانہ کی فلائٹ کا سلسلہ منقطع کیا جانے والا ہے۔

کچھ معتبر ذرائع سے معلوم ہوا ہے کہ جن مسافروں نے دبئی کے لئے راست فلائٹ کی پیشگی ٹکٹ دسمبر کے مہینے کے لئے بک کررکھی تھی انہیں جیٹ ایئر ویز والوں کی طرف سے راست فلائٹ منسوخ کیے جانے کے پیغام موصول ہوئے ہیں اور ان کے لئے منگلورو سے ممبئی ہوکر جانے والی فلائٹ میں انتظام کیے جانے کی اطلاع دی گئی ہے۔بہت سارے مسافروں نے دسمبر میں کرسمس اور نئے سال کے جشن کو سامنے رکھ کر 3سے 6مہینے قبل ہی سے اپنے ٹکٹ بک کرکے رکھے تھے۔ اب اگرواقعتا یہ ٹکٹیں منسوخ کی جاتی ہیں تو پھر مسافروں کو کافی مشکلات کا سامنا کرناپڑسکتا ہے۔

 ایک اور ذرائع سے خبر ملی ہے کہ  جیٹ ایرویز صرف مینگلور سے ہی نہیں بلکہ چار شہروں سے مغربی ایشیا کے لئے اپنی خدمات منقطع کررہی ہے۔ ذرائع کے مطابق جیٹ ائیرویز کی کوزی کوڈ۔ دوحہ اور  تروینتاپورم۔دوحہ سروس 3 دسمبر سے اور کوچی دوحہ اور مینگلور دبئی سروس 5 دسمبر سے بند کی جارہی ہے۔

حالانکہ جیٹ ایئر ویز کی طرف سے ابھی اس کی تصدیق یا تردید نہیں کی گئی ہے بلکہ مبہم سا جواب دیا جارہا ہے۔ لیکن سمجھا جاتا ہے کہ پہلے سے ہی مالی مشکلات میں پھنسی ہوئی ایئر لائن کو نیا جھٹکا کیرالہ کے کنّور میں 9دسمبر سے شروع ہونے والے انٹرنیشنل ایئر پورٹ سے لگا ہے، کیونکہ اب کیرالہ کے مسافر منگلورو  ایئر پورٹ سے آمد و رفت کو ترجیح نہیں دیں گے۔ جیٹ ایئر ویز کے آن لائن پورٹل پر چیک کرنے سے معلوم ہوا ہے کہ وہاں پر 5دسمبر کے بعددبئی سے منگلورو آنے والوں کے لئے براہ راست ممبئی آنے کے لئے ہی ٹکٹ بکنگ کی جارہی ہے۔اسی طرح 6دسمبر سے ابوظہبی منگلورو راست فلائٹ کے لئے بھی بکنگ بند کردی گئی ہے۔

مسافروں کے لئے ایک دوسری مار اس طرح بھی پڑنے والی ہے کہ جیٹ ایئر ویز کی سروس منسوخ ہوجانے کی صورت میں ایئر انڈیا ایکسپریس اور اسپائس جیٹ والے جو دبئی کے لئے راست سروس فراہم کررہے ہیں وہ اس موقع کا فائدہ اٹھا کر دسمبر میں اپنی ٹکٹوں کی قیمت بڑھا سکتے ہیں۔