بھٹکل 12/ڈسمبر (ایس او نیوز) یہاں عثمان نگر کراس نیشنل ہائی وے 66 پر بدھ کی شب کو مہیندرا جیپ اور بائک کے درمیان ہوئی ٹکر میں بائک سوار زخمی ہوگیا جسے مقامی اسپتال میں ابتدائی طبی امداد پہنچانے کے بعد کنداپور منتقل کیا گیا ہے۔
زخمی کی شناخت تعلقہ کے سوڈی گیدے کے رہنے والے چندرناتھ رگھو یر نائک (23) کی حیثیت سے کی گئی ہے۔ بتایا گیا ہے کہ چندرناتھ ایک پرائیویٹ شوروم میں ملازمت کرتا ہے، رات کو ڈیوٹی ختم کرنے کے بعد اپنے گھر جارہا تھا کہ آئی آر بی کمپنی کی ایک جیپ مخالف سمت سے اس کی بائک سے ٹکراگئی۔ چندرناتھ کے سر سمیت پاوں اور پیٹ کو چوٹیں آئی ہیں، البتہ وہ خطرہ سے باہر بتایا گیا ہے۔
بتایا گیا ہے کہ بائک کو ٹکر مارنے کے بعد جیپ ڈرائیور اور جیپ پر سوار دیگر دو لوگ جیپ چھوڑ کر فرار ہوگئے، مگر مقامی لوگوں نے زخمی نوجوان کی فوری مدد کرتے ہوئے اُسے سرکاری اسپتال پہنچایا۔
اس تعلق سے رپورٹ لکھے جانے تک پولس تھانہ میں کوئی شکایت درج نہیں کی گئی تھی۔