بنگلورو:23؍جولائی (ایس او نیوز) رکن اسمبلی بی زیڈ ضمیر احمد خان نے سابق وزیر اعظم و جنتادل (سیکولر) کے قومی صدر ایچ ڈی دیوے گوڈا کو چیلنج کیا ہے کہ اگر آنے والے ریاستی اسمبلی انتخابات میں حلقہ چامراج پیٹ سے جنتادل (سیکولر) امیدوار نے جیت حاصل کی تو وہ اپنا سرکاٹ کر پیش کریں گے۔ یہاں اخباری نمائندوں سے بات کرتے ہوئے ضمیر احمد خان نے یہ زور دار چیلنج کیا اور کہا کہ چامراج پیٹ حلقہ سے بطور جنتادل (سیکولر) انتخابات میں حصہ لینے والا کوئی بھی امیدوار جیت حاصل نہیں کرے گا اور اگر جیت گیا تو وہ اپنا سرکاٹ کر رکھ دیں گے۔ انہوں نے سوال کیا کہ اگر جنتادل (سیکولر) کے ریاستی صدر وزیر اعلیٰ بننا چاہتے ہوں تو ریاست کے تمام اسمبلی حلقوں کو چھوڑ کر دیوے گوڑا چامراج پیٹ حلقہ آئیں لیکن وہاں جنتادل (سیکولر) امیدوار کی جیت تو درکنار، ضمانت بھی برقرار نہیں رکھ سکتا۔ ضمیر احمد خان نے کہا کہ دیوے گوڈا کا وہ بے حد احترام کرتے ہیں لیکن وہ اس حد تک سیاست کریں گے اس کا گمان نہیں تھا۔ ضمیر نے کہا کہ انہوں نے کبھی بھی گندی اور مفاد پرست سیاست نہیں کی۔ انہوں نے کہا کہ چامراج پیٹ میں منعقد اجلاس کے لئے گزشتہ ایک ماہ سے کافی محنت کی گئی تھی لیکن ممکن نہیں ہوسکا تاہم ضد پر آکر چامراج پیٹ کے آزاد نگر میں جو اجلاس منعقد کیا تھا اور اس اجلاس میں کتنے افراد حاضر تھے اس سے سب واقف ہیں جبکہ انہوں نے خود اپنے بل بوتے پر حلقہ چامراج پیٹ سے اپنی جیت حاصل کی تھی۔ اس میں حلقہ کے ووٹران کا بھر پور تعاون رہا تھا۔ آئندہ بھی ان کے حلقہ کے ووٹران اس سے کہیں اور زیادہ اپنا تعاون کرنے کا بھر پور یقین ہے۔