بنگلورو،26؍مئی(ایس او نیوز) ریاستی جنتادل (ایس) صدر ایچ ڈی کمار سوامی نے کہا کہ آنے والے اسمبلی انتخابات کیلئے جنتادل (ایس) نے ریاست کے 224میں سے 188 امیدواروں کی فہرست تیار کرلی ہے۔ 15جون کے بعد پارٹی کے قومی سربراہ دیوے گوڈا کی منظوری کے بعد یہ فہرست جاری کردی جائے گی۔آج بیجاپور میں اخباری نمائندوں سے بات چیت کرتے ہوئے کمار سوامی نے کہاکہ جنتادل (ایس) نے اگلے انتخابات تنہا لڑنے کا فیصلہ کیا ہے اور پارٹی کو یقین ہے کہ وہ اکثریت حاصل کرکے ریاست کے اقتدار پر قبضہ کرلے گی۔ انہوں نے کہاکہ پارٹی نے اپنے امیدواروں کی فہرست کسی نجومی کے مشورہ پر نہیں، بلکہ پارٹی کیلئے محنت کرنے والے کارکنوں کی صلاحیتوں کی بنیاد پر تیار کی ہے۔ انہوں نے کہاکہ اگلے انتخابات میں وہ ریاست کے دو اسمبلی حلقوں سے قسمت آزمائیں گے۔شمالی کرناٹک کے کسی حلقہ سے وہ انتخاب لڑنے کے بارے میں کافی سنجیدہ ہیں۔ کمار سوامی نے کہاکہ عنقریب کانگریس کے دو سینئر لیڈران سی ایم ابراہیم اور ایچ وشواناتھ جنتادل (ایس) میں شامل ہوجائیں گے۔ سی ایم ابراہیم اور دیوے گوڈا کے درمیان ایک دور کی بات چیت بھی ہوچکی ہے۔ جنتادل (ایس) کے سات باغیوں کے متعلق ایک سوال پر کہاکہ ان لوگوں کی اب پارٹی کو کوئی ضرورت نہیں ہے۔ ان کے بغیر بھی پارٹی کو آگے بڑھانے کے منصوبے مرتب کرلئے گئے ہیں۔ آنے والے دنوں میں ان سات باغیوں کو چھوڑ کر جو بھی لیڈر جنتادل (ایس) کا حصہ بننا چاہتا ہے پارٹی اس کا خیر مقدم کرے گی۔مرکز کی مودی حکومت پر نکتہ چینی کرتے ہوئے کمار سوامی نے کہاکہ پچھلے تین سال کے دوران مودی نے غریبوں کوپریشانیوں میں ڈالا اور بڑی بڑی کمپنیوں کو راحت پہنچائی۔ بی جے پی کی تین سالہ کارکردگی پر اس پارٹی کے قومی صدر امیت شا کے بیان پر نکتہ چینی کرتے ہوئے کہاکہ مودی اس ملک کے عوام کیلئے نہیں بلکہ تین کمپنیوں کیلئے کام کررہے ہیں۔ نوٹ بندی کے ذریعہ مرکزی حکومت نے کوئی کامیابی حاصل نہیں کی۔ مودی کے پاس یہ حساب نہیں ہے کہ ملک میں کتنا کالا دھن واپس آیا۔ اگر حساب ہے تو کمار سوامی نے چیلنج کیاکہ اسے منظر عام پر لایا جائے۔ انہوں نے سابق وزیراعلیٰ بی ایس یڈیورپا کے دعوے کوجھوٹا قرار دیا کہ بی جے پی کے دور اقتدار میں دو مرتبہ کسانوں کے قرضہ جات معاف کئے گئے۔