بنگلورو،19؍مئی(ایس او نیوز) جنتادل (ایس) رکن کونسل ٹی اے شرونا نے اعلان کیا کہ ریاست کے سبھی 224اسمبلی حلقوں میں جنتادل (ایس) کی طرف سے پارٹی کے قومی سربراہ ایچ ڈی دیوے گوڈا سے منسوب اپاجی کینٹین قائم کی جائے گی۔اس کے پہلے مرحلے کے طور پر بسونگڈی میں ایک کینٹین قائم کی جاچکی ہے۔اگلے چند ہی دنوں میں بنگلور کے تمام 28اسمبلی حلقوں میں اپاجی کینٹین کا قیام کیا جائیگا۔ انہوں نے کہاکہ اس کینٹین کیلئے خوردنی اناج ، ترکاری وغیرہ راست طور پر کسانوں سے خریدی جائیں گی اور یہاں اٹلی ، وڈا ، سامبر صرف پانچ روپیوں میں مہیا کرایا جائے گا، جبکہ دوپہر کا کھانا دس روپے میں دیا جائے گا۔ صبح پانچ بجے سے سہ پہر چار بجے تک یہ کینٹین کھلے رہیں گے، جتنے لوگ بھی آئیں گے ان تمام کو صاف ستھرا اور معیاری کھانا ان کینٹینوں میں مہیا کرایا جائے گا۔ کینٹینوں میں کھانے کی معیار کی نگرانی کیلئے ٹیکنیکی ماہرین کی ٹیم متعین کی گئی ہے۔ اس دوران جنتادل (ایس) نے گزشتہ لوک سبھا انتخابات میں وزیراعظم مودی کی طرف سے شروع کی گئی چائے پہ چرچا کے طرز پر ریاست بھر میں مدے پہ چرچا کا سلسلہ شروع کرنے کا فیصلہ کیا ہے۔ ریاست کے مختلف مقامات پر پارٹی کی طرف سے راگی مدے اور بھاجی کا سالن مہیا کرایا جائے گا، اور یہ کھاکر مختلف سیاسی امور پر تبادلۂ خیال ہوگا ، پارٹی کے قائدین بشمول سابق وزیراعظم دیوے گوڈا ، سابق وزیر اعلیٰ کمارسوامی اور دیگر رہنما ریاست کے مختلف علاقوں میں کسانوں اور عوام کے ساتھ راگی مدے کھاکر مختلف امور پر بحث کریں گے۔ عوام سے پارٹی کو جوڑنے کیلئے یہ پہل کی گئی ہے۔ شمالی کرناٹک میں اس طرح کی بحث جوار کی روٹی کھاکر کی جائے گی۔