جے ڈی ایس کے صوبائی اور ضلعی عہدیداروں کا تقرر جلد:ایچ وشواناتھ
بنگلورو،24؍ستمبر(ایس او نیوز) ریاستی جے ڈی ایس صدر ایچ وشواناتھ نے کہا ہے کہ عنقریب پارٹی کی ضلع اور ریاستی سطحوں کی یونٹوں کو مضبوط کرنے کے مقصد سے نئے عہدیداروں کا تقرر کیا جائے گا۔
اخباری نمائندوں سے بات چیت کرتے ہوئے انہوں نے کہاکہ پارٹی کو بنیادی سطح سے مضبوط کرنے کے مقصد سے نئی ٹیموں کی تشکیل دی جارہی ہے۔ انہوں نے کہا کہ ریاست کی جے ڈی ایس کانگریس مخلوط حکومت ریاست کو ترقی کی طرف لے جانے کی خواہاں ہے، لیکن بی جے پی غیر ضروری سیاسی انتشار پیدا کرکے ریاست کے ترقیاتی عمل کو متاثر کرنے کی کوشش کررہی ہے۔
انہوں نے کہا کہ جن ریاستوں میں بھی علاقائی سیاسی جماعتوں کے ہاتھوں میں اقتدار ہے ان ریاستوں کے مفادات کے تعلق سے فیصلے لینے میں حکومتوں کو کافی آسانی ہے۔ قومی سیاسی جماعتیں کسی بھی صوبائی سطح کے مسئلے پر فیصلہ اتنی آسانی سے نہیں لے سکتیں کہ ان جماعتوں کو تمام صوبائی یونٹوں کے مفادات کا خیال رکھنا پڑتا ہے۔
ریاستی حکومت کی طرف سے پیٹرول اور ڈیزل کے سیس میں کمی لانے کے فیصلے کا خیر مقدم کرتے ہوئے انہوں نے کہاکہ 48 ہزار کروڑ روپیوں کے زرعی قرضوں کی معافی کا جو فیصلہ وزیر اعلیٰ ایچ ڈی کمارسوامی نے لیا ، یہ عوام اور خاص طور پر کسانوں کی فلاح کے لئے ایک انقلابی قدم ہے۔
انہوں نے کہاکہ ریاست میں کانگریس اور جے ڈی ایس مخلوط حکومت کا ایک اہم مقصد یہ بھی ہے کہ شہریوں کی معیاری زندگی کو بہتر بنایا جائے۔ بی جے پی نکتہ چینی کرتے ہوئے انہوں نے کہاکہ وہ صرف حکومت پر تنقید کرنے کی بجائے ایک تعمیری اپوزیشن پارٹی ہونے کا رول بھی ادا کرے۔