بنگلورو:19/اپریل(ایس او نیوز)گزشتہ راجیہ سبھا انتخابات میں جنتادل (ایس) قیادت کے خلاف بغاوت کرکے کراس ووٹنگ کرنے والے ماگڑی کے رکن اسمبلی ایچ سی بال کرشنا نے بی جے پی میں شمولیت کیلئے پرتولنے شروع کردئے ہیں۔آج انہوں نے اس سلسلے میں سابق وزیراعلیٰ اور ریاستی بی جے پی صدر بی ایس یڈیورپا سے ڈالرس کالونی میں واقع ان کی رہائش گاہ پہنچ کر ملاقات کی اور دونوں رہنما ؤں کے درمیان کافی طویل بات چیت ہوئی۔سیاسی حلقوں میں اس ملاقات کو لے کر یہی کہاجارہا ہے کہ بالکرشنا نے اپنے ماگڑی حلقہ میں سیاسی پہچان بنائے رکھنے کے مقصد سے بی جے پی کا رخ کرنے کا فیصلہ کیا ہے۔ یاد رہے کہ ایچ سی بال کرشنا اس سے پہلے بھی بی جے پی ٹکٹ پر ماگڑی سے ایک مرتبہ منتخب ہوچکے ہیں بعد میں انہوں نے جنتادل (ایس) میں شمولیت اختیار کرلی، ایک مرتبہ بی جے پی سے نمائندگی کے بعد تین مرتبہ وہ اسی حلقہ سے جے ڈی ایس سے منتخب ہوئے ہیں۔ یڈیورپا سے ملاقات کے بعد اخباری نمائندوں سے بات چیت کرتے ہوئے بالکرشنا نے کہاکہ اس ملاقات کے دوران انہوں نے کسی بھی سیاسی امر پر کوئی بات چیت نہیں کی بلکہ ٹمکور کے سدگنگا مٹھ کے سربراہ ڈاکٹر شیوکمار سوامی کے اعزاز میں منعقدہ گرو وندنا پروگرام میں مدعو کرنے کیلئے انہوں نے یڈیورپا سے ملاقات کی۔ انہوں نے کہاکہ جنتادل (ایس) قیادت کے خلاف آواز اٹھانے والے تمام سات اراکین اسمبلی متحد ہیں، ان میں پھوٹ پڑنے کے متعلق کسی طرح کا شک نہ کیا جائے۔ بہت جلد تمام سات اراکین کانگریس میں شمولیت کے متعلق فیصلہ لیں گے۔ انہوں نے کہاکہ کل ہی تمام اراکین نے اے آئی سی سی جنرل سکریٹری ڈگ وجئے سنگھ سے بات چیت کی ہے۔ اس موقع پر یڈیورپا نے اپنے خیالات ظاہر کرتے ہوئے تصدیق کی کہ بالکرشنا کی ان سے سیاسی موضوع پر کوئی بات چیت نہیں ہوئی۔ اے آئی سی سی جنرل سکریٹری ڈگ وجئے سنگھ کے اس تبصرہ پر کہ یڈیورپا کی اب ان کے طبقہ لنگایت میں مقبولیت نہیں رہی، جس کی وجہ سے بی جے پی کو گنڈل پیٹ اور ننجنگڈھ حلقوں میں ہارکا منہ دیکھنا پڑا ہے، سابق وزیراعلیٰ نے تبصرہ کرنے سے انکار کردیا۔