راجیہ سبھا انتخابات میں بی ایم فاروق کے حق میں ووٹ دینے جے ڈی ایس کے سبھی ارکان کو وہپ جاری
بنگلورو۔19؍مارچ(ایس او نیوز) 23 مارچ کو ہونے والے راجیہ سبھا انتخابات میں اپنے امیدوار کو کامیاب بنانے کی جدوجہد میں جنتادل (ایس) نے سات باغیوں سمیت اپنے سبھی 37 اراکین اسمبلی کو پارٹی کے امیدوار بی ایم فاروق کے حق میں ووٹ دینے کی ہدایت جاری کرتے ہوئے آج وہپ جاری کردی۔ اس وہپ میں واضح طور پر کہاگیا ہے کہ جنتادل (ایس) کے سبھی اراکین اسمبلی اپنا پہلا ترجیحی ووٹ جنتادل (ایس) امیدوار بی ایم فاروق کے حق میں دیں۔
پارٹی اس بات کی فکر میں ہے کہ جنتادل (ایس) کے سبھی اراکین کے ووٹ اور آزاد ارکان کے ووٹ حاصل کرکے اپنے امیدوار کو راجیہ سبھا میں داخلے کا موقع فراہم کرسکے۔ ساتھ ہی یہ توقع بھی ظاہر کررہی ہے کہ کانگریس اپنے اضافی ووٹ جنتادل (ایس) کو دے گی تاہم کانگریس نے اپنے تیسرے امیدوار کو میدان میں اتار کر جنتادل (ایس) امیدوار کی کامیابی کے امکان پر پانی پھیر دیا ہے۔ 23 مارچ کو جب پولنگ ہوگی اور اس کے بعد جب نتائج کا اعلان کیا جائے گا اسی وقت ظاہر ہوگا کہ جنتادل (ایس) اپنی حکمت عملی میں کس حد تک کامیاب ہوسکی ہے۔