کانگریس ۔جے ڈی ایس حکومت کب تک قائم رہ سکے گی؟
بنگلورو،20؍مئی (ایس او نیوز) کرناٹک کے انتخابات میں سٹے بازوں نے جب ریاست میں مستحکم حکومت دینے کے لئے بی جے پی پر داؤ لگایا تھا تو انہیں نقصان ہوا لیکن اب یہی سٹے باز اس پر بات کررہے ہیں کہ کانگریس ۔جے ڈی ایس اتحاد کب تک چلے گا۔سٹے بازوں کے علاوہ عام لوگ بھی اس سیاست کے تئیں قیاس آرائی کررہے ہیں اور ایسا اس لئے نہیں ہے کہ دونوں جماعتوں نے گزشتہ 33 سالوں کی سیاست میں سب سے مشکل انتخاب لڑا ہے،لیکن یہ اس لئے بھی ہے کیونکہ یہ انتخابی جنگ کافی تلخیوں سے بھی معمور ہے ۔ حالانکہ یہ مانا جارہا ہے کہ یہ دونوں پارٹیاں کئی وجوہات سے آپس میں اتحاد بنانے کے لئے مجبور ہوئے ہیں ۔پہلی بات تو یہ ہے کہ جے ڈی ایس گزشتہ 10سالوں سے اقتدار سے باہر رہی ہے اوراس کے سامنے وجود کی بقا کا سوال ہے اوردونوں جماعتوں کے سامنے بی جے پی کو روکنے کی مجبوری ہے ۔سیاسی تجربہ کار ایم کے بھاسکر راؤ کہتے ہیں کہ یہ سال 2019 کے لوک سبھا انتخابات تک ایک ساتھ رہیں گے ۔ تاہم اب بھی وزارتوں کی تقسیم ،انتظامیہ سے جڑے معاملات اورکئی جمہوری اداروں میں اندراج سے منسلک موضوعات موجود ہیں ۔وہیں پروفیسر مظفر اسعدی کہتے ہیں کہ یہ غیر یقینی اتحاد ہے ۔تاہم اس اتحاد کو کمزورنہیں سمجھا سکتا ہے ۔ یہ ایک تجربہ کی طرح ہے اورکانگریس کی قیادت والی یوپی اے اور بی جے پی کے قیادت والے این ڈی اے اتحاد کی طرح یہ اتحاد قائم رہ سکتا ہے ۔ راؤ مانتے ہیں کہ سابق وزیراعظم اور جے ڈی ایس کے سربراہ ایچ ڈی دیوے گوڈا کانگریس پارٹی میں ریاستی سطح کے لیڈروں سے ایسے مسائل پر بات نہیں کریں گے ۔وہ ایسے مسائل پر صرف سابق کانگریس صدر سونیا گاندھی ہی سے بات کریں گے ۔