جنتادل(ایس) کے مزید باغی کانگریس میں شامل ہوں گے: ضمیر احمد
بنگلورو:22/اپریل(ایس او نیوز) سابق ریاستی وزیر اور جنتادل (ایس) باغی رکن اسمبلی ضمیر احمد خان نے کہاکہ جنتادل(ایس) سے ناراض اراکین اسمبلی کی تعداد محض سات نہیں بلکہ پندرہ سے زائد ہے۔آنے والے دو تین مہینوں میں یہ تمام اراکین اسمبلی پارٹی سے اپنی علیحدگی کااعلان کرکے باضابطہ کانگریس میں شامل ہوجائیں گے۔ اڈپی میں اخباری نمائندوں سے بات چیت کرتے ہوئے انہوں نے اس الزام کی تردید کی کہ اپنے طور پر انہوں نے راجیہ سبھا انتخابات میں کانگریس امیدوار کے حق میں ووٹ دیاتھا اور کہاکہ سابق وزیر اعلیٰ اور ریاستی جنتادل (ایس) صدر ایچ ڈی کمار سوامی کی ہدایت پر سبھی باغی اراکین نے کانگریس کے امیدوار کے سی رام مورتی کے حق میں راجیہ سبھا کیلئے ووٹ دیاتھا۔انہوں نے کہا کہ وہ اپنی اس بات کو ثابت کرنے کیلئے کمار سوامی کے کہے ہوئے مقام پر قرآن کی قسم کھانے تیار ہیں۔ کمار سوامی میں اگر جرأت ہے تو دھرمستھلا پہنچ کر قسم کھائے کہ انہوں نے راجیہ سبھا انتخابات میں باغی اراکین کو کراس ووٹنگ کی ہدایت نہیں دی تھی۔ انہوں نے کہاکہ ہمیشہ سے کمار سوامی کا یہ شیوہ رہا ہے کہ دوسروں پر بے بنیاد الزامات لگاکر اپنے آپ کو بچانے کی کوشش کرتے ہیں۔ کمار سوامی پر قول وفعل کے پابندنہ رہنے کا الزام لگاتے ہوئے انہوں نے کہاکہ ان کے اسی رویہ کے سبب پارٹی اس دہانے پر پہنچ چکی ہے۔ جنتادل (ایس) سے دوبارہ مصالحت کے امکان کو یکسر مسترد کرتے ہوئے انہوں نے کہاکہ مصالحت کی بات اب ایک بند باب ہے، اب جو بھی ہے وہ کانگریس کے ساتھ ہی ہوگا۔کانگریس قیادت سے پارٹی میں شمولیت کے سلسلے میں ان کی بات چیت ہوچکی ہے، ان کے تمام ساتھیوں کے ہمراہ عنقریب وہ باضابطہ کانگریس پارٹی میں شمولیت اختیار کرلیں گے۔