بنگلورو18؍فروری (ایس او نیوز)  شہر کے یلہنکا میں جنتادل (ایس) کا  شاندار جلسہ کمارا پرو یاترا کنونشن کے نام پر سنیچر شام کو منعقد ہوا ، جس میں ریاست کے مختلف گائوں اور دیہاتوں سے کثیر تعداد میں لوگوں نے   شرکت کی۔ اس موقع پر سابق وزیراعلیٰ  کماراسوامی نے  ریاست کرناٹک میں آئندہ دو  تین ماہ بعد ہونے والے اسمبلی انتخابات کے لئے  126  اُمیدواروں کی پہلی فہرست جاری کی جس میں بھٹکل اسمبلی حلقہ سے عنایت اللہ شاہ بندری کا بھی نام شامل ہے۔

ویسے تو پوری ریاست کرناٹک  میں کانگریس اور سدرامیا کی لہر چلتی نظر آرہی  ہے، مگر کماراسوامی نے اس موقع پر دعویٰ  کیا کہ  اس  مرتبہ ریاست کرناٹک میں  جے ڈی ایس کی حکومت بنے گی اور کوئی بھی پارٹی ، ان کو  حکومت بنانے سے نہیں روک سکے گی۔

کماراسوامی کے مطابق  جے ڈی ایس  کو ہر جگہ مل رہی مقبولیت سے کانگریس اور بی جے پی لیڈروں کو پریشانی لاحق ہوگئی ہے اور ان کی نیندیں حرام ہوگئی ہیں ۔ کماراسوامی نے اس بات کا بھی دعویٰ کیا کہ انہوں نے وزیر اعلیٰ بن کر جو کارنامے انجام دئے  تھے اور جن نئی اسکیموں  اور پروگراموں کو جاری کیا تھا آج بھی لوگ اسے یاد کرتے ہیں۔

کماراسوامی نے  سدارامیا کو ایک جھوٹا  اور دھوکہ باز وزیر اعلیٰ  قرار دیتے ہوئے کہا کہ سدارامیا نے اس سال کے بجٹ میں کئی جھوٹے اعلانات کرنے کے ذریعہ عوام کو دھوکہ دیا ہے اور عوام کو  گمراہ کرنے کی کوشش کی ہے۔ ان کے مطابق   موجودہ  سدارامیا حکومت سے لوگ مایوس ہو چکے ہیں اور یہ حکومت تمام محاذوں پر ناکام ہوچکی ہے۔ انہوں نے سدارامیا پر کسانوں اور آبپاشی پروجکٹوں کو بالکل نظر انداز کرنے کا بھی الزام لگایا۔ کماراسوامی نے کہا کہ اگر آئندہ انتخابات میں  ان کی پارٹی کو اقتدار حاصل ہوتا ہے  تو وہ سدارامیا حکومت کے تمام گھوٹالوں اور بدعنوانیوں کی جانچ کرائیں گے۔

اس موقع پر مرکز کی مودی حکومت پر زبردست وار کرتے ہوئے  اُترپردیش کی سابق وزیر اعلیٰ مایاوتی نے کہا کہ نریندر مودی کی حکومت اب آخری سانس لے رہی ہے اور بی جے پی اور ہندوتوا طاقتوں کا رام مندر تعمیر کرنے کا خواب کبھی  پورا نہیں ہوگا۔ مایاوتی نے  مودی  سے  مخاطب ہوتے ہوئے کہا کہ وہ عوام کو گمراہ کرنا چھوڑ دے اور ہندوستان کی اصلی تصویر پیش کرے، گذشتہ چار سالوں میں اُن کی حکومت  نے کیا کارنامے انجام دیئے اور کتنے وعدے پورے کئے، اُس پر بات کرے۔ مایاوتی نے مودی کو چیلنج کیا کہ وہ اُن کے ساتھ بحث کرنے کے لئے آئے۔ آگے بتایا کہ وہ اس  معاملے میں مودی کے ساتھ بحث کرنے کے لئے تیار ہیں،جس کے ذریعے وہ مودی کے اصلی چہرے کو بے نقاب کریں گی۔

مایاوتی نے کہا کہ مودی نے عوام سے وعدہ کیا تھا کہ وہ ہر سال دو کروڑ روزگار کے مواقع فراہم کریں گے، مہنگائی کو ختم کریں گے، رشوت خوری کا خاتمہ ہوگا، غیر ملکی بینکوں میں جمع کیا گیا کالادھن ہندوستان  لاکر ہر شہری کے کھاتے میں پندرہ پندرہ  لاکھ روپئےجمع کرائیں گے۔ تمام لوگوں کو مکانات، رسوئی گیس ، صحت، بیمہ اسکیم اور دیگر کئی وعدے کئے تھے، مگر وہ ایک بھی وعدہ پورا کرنے میں ناکام رہے ہیں۔

مایاوتی نے مودی پر راست الزام لگاتے ہوئے کہا کہ  وہ ہرماہ غیر ممالک کا دورہ کرتے ہیں اور وہاں جاکر ہندوستان کی توہین کرتے ہیں۔ مایاوتی نے اس موقع پر کانگریس کے کاموں کی سراہنا کی اور کہا کہ اگر کانگریس کے پہلے وزیراعظم جواہر لال نہرو کی دور اندیشی اور حکمت عملی نہ ہوتی تو ہندوستان آج ترقی یافتہ ملک نہیں بن سکتا تھا اور نہ ہی مودی ملک کے وزیراعظم بن سکتے تھے۔

مایاوتی نے مودی کو آڑے ہاتھوں لیتے ہوئے کہا کہ مودی اور بی جے پی کا ایک ہی ایجنڈہ ہے کہ کسی بھی طرح ملک کو ہندوراشٹربنایا جائے اور  تمام لوگوں کے اختیارات چھین لئے جائیں۔ انہوں نے پورے عزم کے ساتھ کہا کہ مودی اور بی جے پی کا یہ مقصد ہرگز پورا نہیں ہوگا۔ مایاوتی نے کرناٹک کو امن کا گہوارہ قرار دیتے ہوئے کہا کہ مودی بھلے کتنی ہی بار بی جے پی کی تشہیر کے لئے کرناٹک کا دورہ کریں، مگر یہاں کے عوام صرف سیکولر پارٹیوں کو ہی ووٹ دیں گے۔ انہوں نے جیل جاکر آئے ہوئے سابق وزیرا علیٰ یڈی یورپا کا نام پھر ایک بار بی جے پی کی جانب سے وزیراعلیٰ کے اُمیدوار کے طور پر پیش کرنے پر  افسوس کا اظہار کیا اور کہا کہ اس سے بڑھ کر شرم کی بات کیا ہوگی۔

پروگرام کا افتتاح کرتے ہوئے سابق وزیراعظم ایچ ڈی دیوے گوڈا نے خطاب کرتے ہوئے سدرامیا کو مغرور اور گھمنڈی وزیراعلیٰ قرار دیا اور کہا کہ انہوں نے اپنے 60 سالہ سیاسی زندگی میں ایسا اکڑپن دکھانے والا مغرور اور دھوکہ باز وزیراعلیٰ نہیں دیکھا۔ انہوں نے مزید بتایا کہ  سدارامیا کو سیاست میں لاکر میں نے بہت بڑی  غلطی کی ہے، اگر مجھے سدرامیا کی سیاسی چالوں کا پہلے ہی پتہ ہوتا  تو  میں اسے کبھی اپنے قریب نہ رکھتا۔ دیوے گوڈا نے دعویٰ کیا کہ آج سدرامیا جو کچھ بھی ہیں، وہ  اُن کی  بدولت ہے، ورنہ  آج سدرامیا  ایک ناکارہ وکیل ہونے کی وجہ سے عدالتوں میں ٹھوکریں کھاتے پھر رہے ہوتے۔

دیوے گوڈا نے بتایا کہ وہ اب کوئی بھی انتخابات نہیں لڑیں گے، مگر آخری سانس تک سیاست میں ہی رہیں گے اور پارٹی کو مفید مشوروں سے نوازتے رہیں گے۔ گوڈا کے مطابق اب ہندوستان میں کوئی بھی پارٹی اپنے بل  پر حکومت نہیں بناسکتی انہوں نے  وزیر اعظیم نریندر مودی کے تعلق سے بھی بات کرتے ہوئے کہا کہ مودی نے  لوگوں کو دھوکہ دے کر  بی جے پی کو اقتدار دلانے اور حکومت بنانے میں کامیابی حاصل کی  مگر اب مودی کا چہرہ بے نقاب ہوگیا ہے ، جس کے ساتھ ہی اب  بی جے پی مرکز میں کبھی بھی حکومت نہیں بناسکے گی۔

انہوں نے  کانگریس کی سابق صدر سونیا گاندھی کے تعلق سے کہا کہ وہ اب  کافی کمزور ہوچکی ہے،  انہوں نے  موجودہ صدر راہل گاندھی کے تعلق سے اپنے خطاب میں  بتایا کہ  راہول گاندھی کو اپنی ساتھی سیاسی پارٹیوں کو ساتھ لیکر چلنے کا تجربہ نہیں ہے۔ گوڈا کے مطابق کانگریس پارٹی اب صرف ایک ہی خاندان کی پارٹی بن کر رہ گئی ہے۔

اس موقع پر پارٹی کے کئی ایک سینئر لیڈرس ، سابق وزراء ، کئی اضلاع سے آئے ہوئے  پارٹی لیڈرس اور کارکن موجود تھے۔