ٹرمپ کے ساتھ گالف کھیلتے ہوئے جاپانی وزیراعظم گڑھے میں جا گرے
ٹوکیو،11؍نومبر (ایس او نیوز؍آئی این ایس انڈیا) امریکی صدر ڈونلڈ ٹرمپ کے ایشیائی ملکوں کے حالیہ دورے کے دوران پیش آنے والے بعض واقعات میڈیا کی توجہ کا خاص مرکز ہیں۔ بعض ذرائع ابلاغ نے ٹرمپ کا اپنی اہلیہ اور خاتون اول ملانیا ٹرمپ کو چین میں پیچھے چھوڑ آنا بھی زیر بحث ہے۔ سوشل میڈیا پر اس پرطرح طرح کی باتیں کی جا رہی ہیں۔جاپان کے دورے کے دوران صدر ٹرمپ اور جاپانی قیادت کے درمیان ہونے والی بات چیت میں شمالی کوریا کی طرف سے لاحق خطرات اہم موضوع رہا مگر جاپان میں امریکی صدر کی آمد کے بعد ایک واقعہ عالمی توجہ کا مرکز بنا ہے۔ امریکی صدر اور جاپانی وزیراعظم شنزو ایبے ایک کھلے میدان میں گالف کھیل رہے تھے کہ اس دوران وزیراعظم شنزو ایبے پاؤں پھسلنے سے ایک گہرے گڑھے میں سرکے بل جا گرے۔اگر جاپانی ٹی وی چینل کا کیمرہ وہاں نہ ہوتا تو شاید یہ واقعہ اتنا رپورٹ نہ ہوتا مگر کیمرے کی آنکھ نے وزیراعظم شنزو ایبے کے گرنے کے مناظر محفوظ کرلیے۔میڈیا پر سامنے آنے والی فوٹیج میں دیکھا جا سکتا ہے کہ صدر ٹرمپ آگے آگے چل رہے ہیں جب کہ جاپانی وزیراعظم ان کے پیچھے ہیں۔ انہوں نے توجہ نہیں کی کہ وہ ایک گڑھے کے کنارے پر ہیں جہاں اچانک ان کا پاؤں پھسلا اور وہ گڑھے میں جا گرے۔اخبار ’واشنگٹن پوسٹ‘ نے بھی اس واقعے کی تفصیلات اور آبے کے گڑھے میں گرنے کی تصاویر شائع کی ہیں۔
سوشل میڈیا پر شنزو آبے کے ساتھ پیش آئے حادثے کی فوٹیج اور تصاویر وائرل ہیں جہاں ان پر بھرپور مزاحیہ تبصرہ آرائی جاری ہے۔خیال رہے کہ صدر ٹرمپ گالف کے دیوانے ہیں۔ وہ جاپان گئے اور جاپانی وزیراعظم سے خصوصی فرمائش کے تحت ’کاسومی‘ کلب میں گذشتہ اتوار کو گالف بھی کھیلا۔رواں سال جب جاپانی وزیراعظم شنزو ابیے امریکا کے دورے پر آئے تو انہوں نے واشنگٹن میں صدر ٹرمپ کے ساتھ گالف کھیلا تھا۔