اکثریت نہیں ملی تو جنتادل (یس) اپوزیشن کا رول نبھائے گی: دیوے گوڈا
چکمگلور:9؍دسمبر (ایس او نیوز) سابق وزیر اعظم و جنتا دل (یس) کے قومی صدر ایچ ڈی دیوے گوڈا نے یہاں واضح کیا کہ آنے والے ریاستی اسمبلی انتخابات میں اگر جنتادل (یس) کو اکثریت حاصل ہوئی تو بہتر انتظامیہ فراہم کیا جائے گا۔ ورنہ اپوزیشن جماعت کا رول نبھائیں گے۔ کسی کے ساتھ کوئی سمجھوتہ نہیں کیا جا ئے گا۔ یہاں اخباری نمائندوں سے بات کرتے ہوئے دیوے گوڈا نے یہ وضاحت پیش کی اور کہا کہ اس سے قبل دھرم سنگھ کی حمایت کر کے دیکھ لیا، کمار سوامی کی جانب سے بی جے پی کی دوستی بھی دیکھ لی، اگرآئندہ انتخابات میں اکثریت حاصل نہیں ہوئی تو کانگریس یا بی جے پی کی حمایت نہیں کی جائے گی بلکہ اپوزیشن کا رول ادا کیا جائے گا۔ پارٹی امیدواروں کے انتخاب کے تعلق سے دیوے گوڈا نے کہا کہ تمام رہنماؤں کو اعتماد میں لینے کے بعد فیصلہ لیا جائے گا۔ چند حلقوں میں سخت مقابلہ ہے ان تمام پر قابو پانے کے بعد یہی حتمی فیصلہ لیا جائے گا۔ ایک سوال کے جواب میں گوڈا نے کہا کہ جنتادل (یس) کنگ ہو یا کنگ میکر ہو اس کا فیصلہ عوام کریں گے۔وزیر اعلیٰ سدارامیا کو تنقید کا نشانہ بناتے ہوئے انہوں نے کہا کہ سدارامیا سماجی انصاف کی وکالت کرتے ہیں لیکن خود انہوں نے اس پر عمل نہیں کیا ہے ، جب ریاست میں خود میری قیادت میں جنتادل (یس) حکومت تھی پسماندہ طبقات کے 7؍افراد کو کابینہ درجے کو وزیر بنایا گیا تھا 8 لنگایتوں کو وزارت سے نوازا گیا۔سدارامیا نے اس طرح سماجی انصاف کیا ہے کہ خود اپنے طبقہ سے تعلق رکھنے والے صرف میئی کو وزیر بنایا وہ بھی ان کے ہاتھ سے گئی۔ دیوے گوڈا نے کہا کہ سدارامیا کا یہ الزام کہ گوڈا کی وجہ سے انہیں وزیر اعلیٰ کا عہدہ نہیں ملا بالکل بے بنیاد ہے کیونکہ 1996میں 38عدد لنگایت اراکین اسمبلی تھے صرف 4کروبا طبقہ سے تعلق رکھنے والے تھے اب انہیں نشانہ بنایا جارہا ہے۔