یڈیورپا کے زخموں پر بی جے پی نے ہی چھڑکا نمک؛ ریڈی برادران کو ریاست میں انتخابی مہم نہ چلانے کا حکم
بنگلورو27اپریل(ایس او نیوز) ریاست کے اقتدار پر قبضہ کرنے کے خواب دیکھتے ہوئے بلاری کے ریڈی برادران کی مدد حاصل کرنے والی بی جے پی کو آج اس وقت شدید جھٹکا لگا جب بی جے پی اعلیٰ کمان نے ریڈی برادران میں سب سے زیادہ بدنام سابق وزیر جناردھن ریڈی کو یہ سخت تاکید کی کہ وہ ریاست میں بی جے پی کے حق میں انتخابی مہم نہ چلائیں۔
یڈیورپانے کل ہی کہاتھاکہ انہوں نے جناردھن ریڈی کی تمام غلطیوں کو ریاستی عوام کی مفادات کی خاطر معاف کردیا ہے، ان کے اس بیان کے فوراً بعد آج بی جے پی نے دوبارہ جناردھن ریڈی سے اپنے تعلقات سے دامن جھاڑ لیا اور یہ واضح طور پر ہدایت دی کہ جناردھن ریڈی ریاست کے کسی بھی حصے میں بی جے پی کے حق میں انتخابی مہم چلانے کی حماقت نہ کریں۔
پارٹی اعلیٰ کمان نے ان سے کہا ہے کہ درپردہ اگر وہ چاہیں تو پارٹی کی مدد کرسکتے ہیں، لیکن ریاست کے کسی بھی حصے میں وہ کھلے عام انتخابی مہم میں حصہ نہ لیں۔ پارٹی اعلیٰ کمان کی ہدایت سے ایک طرف ریاستی بی جے پی صدر بی ایس یڈیورپا سخت ناراض ہیں تو دوسری طرف بلاری میں اب تک بی جے پی کے حق میں انتخابی جوڑ توڑ میں لگے ہوئے جناردھن ریڈی کو بھی شدید جھٹکا لگا ہے۔ کہا جارہا ہے کہ بی جے پی اعلیٰ کمان کی ہدایت کے بعد مولکالمرو اسمبلی حلقے سے پارٹی کے رکن پارلیمان بی سری راملو کی کامیابی یقینی بنانے کے لئے جناردھن ریڈی کی مہم شروع ہونے سے پہلے ہی ختم ہوگئی ، جبکہ بادامی اسمبلی حلقے میں وزیر اعلیٰ سدرامیا کے خلاف میدان میں اترنے بی سری راملو کو اپنے فیصلے پر پچتانا پڑے گا۔