بھٹکل 16؍مارچ (ایس او نیوز)   جمعرات صبح 10 بجے جامعہ اسلامیہ کی مسجد میں امسال جامعہ اور اس کے جملہ مکاتب سے حافظ ہونے والوں کے اعزاز میں ایک خوبصورت محفل سجائی گئی جس میں سابق صدر شعبہ حفظ جامعہ اسلامیہ جناب حافظ کبیر الدین صاحب نے حفاظ کے حفظ کی تکمیل کرائی ،  اس موقع پر حفاظ کو گرانقدر انعامات سے بھی نوازا گیا۔

جلسہ کا آغاز قاری فہیم الدین بن حافظ کبیر الدین صاحب  کی خوش الحان تلاوت سے ہوا،  صیام رکن الدین نے بارگاہ رسالت میں گلہائے نعت پڑھی۔ اس موقع پر حفاظ کے حق میں طریف ابوحسینا نے منظوم تہنیتی کلام اپنی سریلی آواز میں پیش کیا جس میں انہیں مبارکبادی کے کلمات کے ساتھ زندگی بھر قرآن کی تلاوت کا معمول رکھنے اور قرآن سے تعلق رکھنے کی ترغیب دی گئی تھی۔ نیز دوران جلسہ  جناب ماہر القادری کی نظم قرآن کی فریاد عزیزی حسن ثابت نے پیش کی۔صدر شعبہ حفظ جامعہ اسلامیہ مولانا حافظ عمران صاحب اکرمی نے مہمانوں کا استقبال کیا جبکہ مولانا حافظ عرفان صاحب ندوی نے قرآن مجید کی عظمت اور حفاظ کی ذمہ داریوں پر روشنی ڈالی۔ ان کے  علاوہ مہتمم جامعہ مولانا مقبول احمد صاحب کوبٹے ندوی و دیگر علماء کرام نے اپنے اپنے تاثرات میں تمام حفاظ کو مبارکباد پیش  کرتے  ہوئے قرآن کریم کی تلاوت اور اس پر عمل کی ضرورت پر مفید نصائح سے نوازا۔ 

جلسہ میں ہر حافظ قرآن نے اپنی خوش الحان تلاوت سے سامعین کو محظوظ کیا۔

بتایا گیا ہے کہ سابقہ کچھ سالوں سے جامعہ اسلامیہ سے عالمیت کی تکمیل اور دارالعلوم ندوۃ العلماء لکھنو سے فضیلت کی تکمیل کے بعد حفظ قرآن مجید کے شوق میں طلبہ جامعہ اسلامیہ بھٹکل میں داخلہ لیتے ہیں اور اپنی محنت کے اعتبار سے سال دو سال میں قرآن مجید کو اپنے سینوں میں محفوظ کرلیتے ہیں، اس تقریب میں ایسے پانچ طلبہ شامل رہے، جن کی نمائندگی کرتے ہوئے مولوی جساد ندوی بن عبدالقادر جیلانی سعدا نے اپنے احساسات کا اظہار کیا اور اس سلسلہ کو مزید جاری رکھنے کی ترغیب دی۔ اس کے علاوہ حافظ قتادہ ابن مولانا طلحہ صاحب رکن الدین ندوی نے عالمیت کے ساتھ ساتھ فارغ اوقات میں اپنی والدہ کے پاس قرآن مجید کو حفظ کیا۔

صدر جامعہ مولانا محمد اقبال صاحب ملا ندوی کی دعا اور انعامات کے ساتھ قبل از ظہر جلسہ اختتام کو پہونچا۔ اس موقع پرکئی علماء  و ذمہ داران موجود تھے۔