نئی دہلی، 27؍اگست(ایس او نیوز/آئی این ایس انڈیا)سوریہ نمسکار یا یوگا کے تعلق سے مسلمان کبھی سمجھوتہ نہیں کریں گے ۔مسلمانوں کا اس تعلق سے موقف واضح ہے ۔چونکہ بی جے پی آر ایس ایس کی سیاسی ونگ ہے اور اسی نظریہ کی پابند ہے اس لئے وہ ہندوتوا کو زبردستی نافذ کرنا چاہتی ہے ۔یہ باتیں جماعت اسلامی ہند کے امیر مولانا جلال الدین عمری نے پریس سے ملاقات کے پروگرام میں جنوبی ممبئی ہوٹل ساحل میں کہیں ۔یہ ملاقات جماعت اسلامی ممبئی میٹرو نے جاری مہم امن و انسانیت کے تحت منعقد کیا تھا ۔مذکورہ باتیں امیر جماعت نے ایک صحافی کے سوال کے جواب میں کہیں ۔انہوں نے آگے کہا کہ اول تو مجھے امید ہے کہ حکومت اسے نافذ کرنے میں کامیاب نہیں ہو پائے لیکن اگر اس نے سوریہ نمسکار اور یوگا کو سبھی اسکول میں جبریہ نافذ کیا تو یا تو ہم عدالت کا دروازہ کھٹکھٹا ئیں گے یا دیگر کوئی بھی ملی تنظیم اس سلسلے میں پیش قدمی کرے گی ہم اس کے ساتھ ہوں گے ۔مذہب و نسل کے نام پر پنپ رہے تشدد نے ملک کی تکثیری تانے بانے کو تباہ کرکے رکھ دیا ہے ۔فرقہ پرستی اور نسلی منافرت کی بنیاد پر وقوع پذیر ہونے والے تشدد کے حالیہ واقعات ہماری قدیم گنگا جمنی تہذیب کے لئے بہت بڑا خطرہ ہیں۔فرقہ وارانہ ہیجان پر قابو پانے اور مختلف طبقات کے درمیان مذہبی ہم آہنگی کے قیام کی خاطر جما عت اسلامی ہند نے21اگست سے ایک پندرہ روزہ کل ہند مہم امن و انسانیت جاری ہے جس کا اختتام 4ستمبر 2016کو ہو گا ۔اس سلسلے میں امیر جماعت اسلامی ہند مولانا جلال الدین عمری نے کہا ہمارا یہ سلسلہ مہم تک ہی نہ سمٹ کر رہ جائے امن و امان اس ملک کے تمام لوگوں کی ضرورت ہے ۔مولانا نے کہا کہ ہم نے اس مہم کے تعلق سے عوام میں جو جوش خروش دیکھا ہے جس میں سبھی لسانی و مذہبی گروہ شامل ہیں اس سے یہ ظاہر ہو تاہے کہ ملک کی موجودہ صورتحال سے سبھی لوگ فکر مند ہیں ۔انہوں نے کہا کہ جب ہم اس بات کو باور کرانے میں کامیاب ہو جائیں گے کہ جو حقوق ہمیں حاصل ہیں وہی حق دوسروں کو حاصل ہو نے چاہئیں تو موجودہ ہیجانی کیفیت کا خاتمہ ہو جائے گا ۔کیوں موجودہ حالات میں یہی ایک بات ہے کہ ایک گروہ اپنے لئے سارے حقوق ریزرو رکھنا چاہتا ہے لیکن وہ دوسروں کے لئے وہی حق قبول نہیں کرتا ۔اس صورتحال کو تبدیل کرنا اس پندرہ روزہ مہم امن و انسانیت کا اہم مقصد ہے۔
امیر جماعت اسلامی ہندجلا ال الدین عمر ی نے مہم کے تعلق سے صحافیوں سے ملاقات کے ایک پروگرام میں بتایا کہ آج کچھ لوگ ملک کی فضا کو بگاڑنے کے درپئے ہیں،جبکہ یہ ملک مختلف لسانی اور عقیدوں کے ماننے والوں کا مشترکہ ملک ہے۔لیکن جولوگ اس رنگا رنگ تہذیب کے قائل نہیں وہ مختلف گروہوں کے درمیان غلط فہمیاں پھیلا کر اس افراتفری کے ماحول میں مسلمانوں اور دلتوں کو ان کے دستوری حقوق سے بے دخل کرنا چاہتے ہیں ۔
امن و انسانیت مہم کی تفصیلات بتاتے ہوئے توفیق اسلم خان نے پریس سے روبرو پروگرام میں کہا کہ یہ پورے ملک میں 21اگست سے جاری ہے اس درمیان ہمیں زبردست عوامی حمایت مل رہی ہے جس میں ملت تو شامل ہے ہی لیکن برادران وطن سے بھی بڑی تعداد نے اپنی دلچسپی کا مظاہرہ کیا اور اپنی خدمات پیش کی ہیں ۔اس مہم کی غرض وغایت معاشرے میں ٹھوس اور مضبوط بنیادوں پر تبدیلی کی خاطر عوام کی اجتماعی ضمیر کو بیدار کرنے کی کوشش ہے۔ مہم کے تحت فرقہ وارانہ نفرت اور نسلی امتیاز کا مقابلہ کرنے کے لئے مقامی یا وارڈ جیسے نچلی سطح تک مختلف طبقات کے درمیان رابطہ بنانے کا کام جاری ۔کئی جگہوں پر سدبھاونا کمیٹی بن چکی ہے اور اس پر کام شروع ہو چکا ہے۔اس سلسلے میں امیر جماعت مولانا جلا الدین عمری نے کہا کہ مہم کی اصل رو ح اور ہمارا مقصد اس کے سوا اور کچھ نہیں کہ محض ہفتہ پندرہ روز مہم چلا کر بیٹھ نہ جائیں بلکہ فرقہ وارانہ ماحول کی بگڑتی صورتحال کو قابو میں رکھنے کے لئے دیر پا اور طویل المدتی منصوبہ بندی اور اس پر عمل ضروری ہے اور اسی مقصد کے تحت ہم نے مقامی طور پر سدبھاونا کمیٹی بنانے کا فیصلہ لیا ۔ان مقاصد کے حصول کی خاطر جماعت اسلامی کی اپیل پرسماج کے امن و انصاف پسند لوگوں نے ہماری آواز پر لبیک کہا اور انہوں نے مضبوط ہندوستان کی تعمیر کے لئے کندھاسے کندھا ملا کر ہمارے ساتھ چلنے میں اپنی دلچسپی کا مظاہرہ کیا ہے۔جماعت اسلامی ہند نے مہاراشٹر میں تقریبا تین کروڑ افراد تک اپنا پیغام پہنچانے کا اپنا ہدف مقرر کیا تھا جس میں سے نصف اس نے حاصل کرلیا ہے ۔آج باندرہ کے اجلاس عام میں جماعت اسلامی ہند نے معتبر و نامور سماجی شخصیت اور حقوق انسانی کے سرگرم کارکن شری کرشنا کو سدبھاونا دینے کا فیصلہ کیا ہے۔