بنگال بی جے پی کا متنازعہ بیان، جے شری رام کے نعرے کی مخالفت کرنے والا تاریخ بن جائے گا
بی جے پی اقتدارکی لالچ میں لوگوں کومشتعل کررہی ہے:ترنمول کانگریس نے سخت مذمت کی
کولکا تا ،23؍اپریل (ایس او نیوز؍آئی این ایس انڈیا )ملک بھر میں بی جے پی کی موجودگی کی طرف اشارہ کرتے ہوئے پارٹی کی مغربی بنگال اکائی کے صدر دلیپ گھوش نے کہاکہ ’بھارت ماتا کی جے‘اور ’جے شری رام‘کے نعرے کی مخالفت کرنے والا کوئی بھی شخص تاریخ کا حصہ بن جائے گا۔گھوش نے کہاکہ ملک بھر کے لوگ، گجرات سے گوہاٹی، کشمیر سے کنیا کماری ’بھارت ماتا کی جے‘اور ’جے شری رام‘کے نعرے لگائیں گے، اور جو شخص اس کی مخالفت کرے گا، وہ تاریخ کا حصہ بن جائے گا۔انہوں نے دھمکی آمیز لہجے میں کہا کہ ریاست میں بی جے پی کے کارکنان کے ساتھ کوئی زبردستی نہیں چلے گی۔ گھوش نے حکمراں ترنمول کانگریس کے حامیوں سے مطالبہ کیا کہ وہ اپنی بری عادتیں بدل لیں۔انہوں نے کہاکہ ہندوستان بھر میں بی جے پی کے 11کروڑ رکن ہیں، میں ترنمول کانگریس کے اپنے بھائیوں سے درخواست کرتا ہوں کہ وہ اپنی بری عادتیں تبدیل کر لیں، ورنہ ہم انہیں پوری طرح تبدیل کر دیں گے۔وہیں، گھوش کے تبصرے کو نفرت آمیز اور اشتعال انگیز قرار دیتے ہوئے ترنمول کانگریس کے جنرل سکریٹری پارتھ چٹرجی نے کہا کہ بی جے پی جیسی پارٹی کے کسی لیڈر کے منہ سے اس طرح کا تبصرہ غیر متوقع ہے۔چٹرجی نے جوابی حملہ بولتے ہوئے کہاکہ وہ اس طرح کے نفرت آمیز بیانات اقتدار کے لالچ میں اور لوگوں کو مشتعل کرنے کے لیے دے رہے ہیں، یہ افسوسناک ہے کہ ایک سیاسی پارٹی جس سے شیاما پرساد مکھرجی جیسے لیڈر وابستہ رہے ہیں ، اس کے پاس ریاست میں ایسے لوگوں کا چہرہ ہے۔انہوں نے کہا کہ ملک بی جے پی کے خواب کو چور چور کر دے گا، کیونکہ وہ مذہب کے نام پر لوگوں کو بھڑکانے کی کوشش کر رہی ہے ۔ترنمول کانگریس لیڈر نے کہاکہ گرچہ ان کے پاس 11کروڑ رکن ہوں ، لیکن ان کے منصوبے کو 130کروڑ ہندوستانی ناکام کر دیں گے۔انہوں نے کہاکہ وہ مذہب کے نام پر لوگوں کو اکسانے کی کوشش کر رہے ہیں،لیکن یہ بنگال کی ثقافت نہیں ہے، یہ اہمیت نہیں رکھتا ہے کہ وہ کیا کرتے ہیں، لوگوں کی حمایت ہمیشہ ممتا کے ساتھ ہے۔