غیر محسوب دولت معاملہ :انکم ٹیکس ڈپارٹمنٹ نے ڈی کے شیوکمار کوجاری کیے سمن
منگلورو، 7/؍اگست (ایس او نیوز)تین دن تک ریاستی وزیر توانائی ڈی کے شیوکمار اور ان کے قریبی رشتے داروں کے ٹھکانوں پر چھاپہ ماری اور تلاشی کے دوران مبینہ طور پر ضبط کی گئی300کروڑ روپوں کی غیر محسوب دولت سے تعلق رکھنے والے بے شمار دستاویزات کی تحقیقات کے سلسلے میں انکم ٹیکس ڈپارٹمنٹ کی طرف سے شیو کمار اور ان کے رشتے داروں کوسمنس جاری کیے جانے کی خبر موصول ہوئی ہے۔
خیال رہے کہ محکمہ انکم ٹیکس نے سی آر پی ایف کے تحفظ میں شیوکمار اور ان کے قریبی افراد کے تقریباً 60 ٹھکانوں پر بیک وقت چھاپے مارے تھے اور بڑی تعداد میں منقولہ و غیر منقولہ جائیدادسے تعلق رکھنے والے دستاویزات ضبط کیے گئے تھے۔ موصولہ اطلاع کے مطابق شیوکمار کے علاوہ ان کے سسر تھمیّا،شیوکمار کے معتمد خاص اور نجومی دوارکاناتھ اورسچن نارائن کو بھی سمن جاری کیے گئے ہیں۔ وزیر توانائی شیوکمار نے اس بات کی تصدیق کی ہے کہ آئی ٹی محکمہ کی جانب سے تحقیقات کے لئے انہیں ذاتی طور پر حاضر ہونے کے لئے سمن موصول ہوئے ہیں، جس کے بعد انہوں نے اس پر عمل پیرائی کے لئے 2دن کی مہلت طلب کی ہے۔انہوں نے کہا کہ قانونی تقاضے پورے کرنے کے لئے محکمہ آئی ٹی نے انہیں طلب کیا ہے ۔چونکہ قانون سے بالاتر کوئی بھی نہیں ہے ، اس لئے وہ خود بھی قانونی ضرورت پورا کرنے کے لئے پابند ہیں۔