کاروار 22؍فروری ( ایس او نیوز) ضلع ڈپٹی کمشنر ایس ایس نکول نے متعلقہ افسران کو تاکید کی ہے کہ گھریلو تشدد روک تھام قانون 2005کے تحت محکمہ کے پاس درج معاملات کو جلد نپٹایا جائے۔ 

مسٹر نکول نے اپنے دفتر میں گھریلو تشدد روک تھام کے قانون کے تحت کی جانے والی کارروائیوں کا جائزہ لینے کے لئے منعقد کی گئی جائزاتی میٹنگ میں خطاب کرتے ہوئے یہ بات کہی۔انہوں نے افسران سے کہا کہ گھریلوتشدد کے واقعات اکثر خاندان کی عزت کا خیال کرتے ہوئے محکمہ کے پاس لائے نہیں جاتے۔ لیکن جو بھی معاملات درج کروائے جاتے ہیں ان کو جلد سے جلد حل کرنے کے لئے اچھے وکیل کی خدمات فراہم کرتے ہوئے لوگوں کو راحت دلائی جائے۔

محکمہ بہبودئ خواتین و اطفا ل کے اسسٹنٹ ڈائریکٹرنے تفصیلات فراہم کرتے ہوئے ضلع تمام 11تعلقہ جات میں خواتین کو قانونی امداد فراہم کرنے اور کاونسلنگ وغیرہ کے لئے 11مراکز موجود ہیں۔جہاں سماجی خدمت گار، وکلاء اورخاتون پولیس افسران وغیرہ کی خدمات حاصل رہتی ہیں۔جنوری 2016سے جنوری 2017تک ان مراکز میں جملہ 228 معاملات داخل کیے گئے۔ ان میں سے159معاملات کو حل کردیا گیا ہے۔58معاملات خصوصی افسر کے پاس ہیں ۔ جبکہ 11معاملے عدالت میں زیر سماعت ہیں۔

اس نشست میں موجود ضلع پنچایت کے سی ای او مسٹر ایل چندرا شیکھرنائک نے کہا کہ افسران کو چاہیے کہ وہ بچوں کی شادیوں کو بھی روکنے کی پوری کوشش کریں اور خاص کر جہاں اجتماعی شادیوں کا اہتمام ہوتا ہے وہاں پر اس کے امکانات کو نظر میں رکھتے ہوئے کارروائی کریں۔اس موقع پر ضلع قانونی امداد اتھاریٹی کے سکریٹری دیویندرا پنڈت اور محکمہ بہبودئ اطفال کے افسران موجود تھے۔