کاروار12؍فروری (ایس او نیوز) جوئیڈا کے پولیس کوارٹرز میں غیر قانونی طور پر قیمتی لکڑی اکٹھا کرکے رکھنے کے معاملے میں کلیدی ملزم گروراج ابھی تک لاپتہ بتایا جارہا ہے۔ خیال رہے کہ گروراج محکمہ پولیس کے انٹلی جنس ڈپارٹمنٹ کا اہلکار ہے۔

معلوم ہوا ہے کہ لکڑی ضبطی کا معاملہ سامنے آنے کے بعد گزشتہ تین دنوں سے گروراج لاپتہ ہے اور پولیس کو ا س کاکوئی سراغ نہیں مل رہا ہے۔اسی کے ساتھ اس معاملے میں تحقیقات کس مرحلے میں ہیں اور اس میں کیا چیزیں اب تک پتہ چلی ہیں، اس تعلق سے بھی پولیس اور محکمہ جنگلات کے افسران نے چپکی سادھ رکھی ہے۔پولیس کا ایک اہلکار ہی مجرمانہ سرگرمی میں ملوث پائے جانے سے عوام یہ دیکھنا چاہتے ہیں کہ پولیس اس میں کتنی مستعدی سے کام کرتی ہے اور اس کا انجام کیا نکلتا ہے۔چونکہ قیمتی لکڑیاں ضبط ہونے کے اس معاملے میں محکمہ جنگلات کے افسران کی غفلت کی بھی نشاندہی ہوتی ہے اس لئے کہا جاسکتا ہے کہ یہ کیس دونوں اہم ترین محکمہ جات کے لئے الجھن اور مسائل کا سبب بن گیا ہے۔