کرکوک میں عراقی اور کرد افواج آمنے سامنے
بغداد15اکتوبر ( ایس او نیوز؍آئی این ایس انڈیا)عراق کے صوبے کرکوک میں عراقی اور کرد افواج ایک دوسرے کے خلاف صف آرا ہو گئی ہیں۔ اس علاقے میں عراقی فوج کی کرد پیش مرگا دستوں کو مختلف مقامات سے دستبردار ہونے کی مہلت اتوار پندرہ اکتوبر کی صبح دو بجے ختم ہو گئی ہے۔ ابھی تک کرد پیش مرگا دستے اْن پوزیشنوں سے پیچھے نہیں ہٹے تھے، جن سے پیچھے ہٹنے کا الٹی میٹم عراقی فوج نے دے رکھا ہے۔ کرد پیش مرگا نے ’اسلامک اسٹیٹ‘ کے جہادیوں کے خلاف لڑتے ہوئے ان پوزیشنوں پر قبضہ کیا تھا۔ اگلے محاذوں پر موجود عراقی فوج نے کہا ہے کہ جنرل اسٹاف کے حکم کے منتظر ہیں اور اْس کے بعد ہی کوئی کارروائی کی جائے گی۔ دوسری جانب امریکا فریقین میں صلح اور تنازعے کو ختم کرنے کی کوششوں میں مصروف ہے۔