حج کی کامیابی سے سعودی عرب سے مذاکرات کی راہ ہموار ہوگی:ایران

Source: S.O. News Service | By Shahid Mukhtesar | Published on 5th September 2017, 9:52 PM | خلیجی خبریں | عالمی خبریں |

تہران،5ستمبر(ایس او نیوز؍آئی این ایس انڈیا) ایران نے اس مرتبہ حج کے تمام امور بطریق احسن انجام پانے پر سعودی عرب کا شکریہ ادا کیا ہے اور کہا ہے کہ اس سے دونوں علاقائی حریفوں کے درمیان مذاکرات کی راہ ہموار ہوگی۔ایران کے سرکاری ٹیلی ویژن کے مطابق حج تنظیم کے سربراہ علی غازی عسکر نے ایرانی عازمین کے لیے الگ سے نئی حکمت عملی اختیار کرنے پر سعودی عرب کا شکریہ ادا کیا ہے۔انھوں نے کہاکہ ممالک کے درمیان اختلافات پیدا ہوتے رہتے ہیں لیکن ان کے لیے اہم بات یہ ہے کہ وہ اپنے اختلافات کو ڈائیلاگ اور مذاکرات کے ذریعے طے کریں۔انھوں نے کہا : اب حج کے کامیاب انعقاد کے بعد دونوں فریقوں کے لیے یہ ایک اچھا وقت ہے کہ وہ دوسرے شعبوں میں اپنے دوطرفہ امور کو طے کرنے کے لیے مذاکرات کریں۔

ان کے اس مثبت بیان کے باوجود وزیر خارجہ محمد جواد ظریف نے محتاط ردعمل کا اظہار کیا ہے اور کہا ہے کہ وہ دونوں ممالک کے تعلقات میں ایک واضح تبدیلی کی تصویر کے منتظر ہیں۔اس مرتبہ قریب 86ہزار ایرانیوں نے فریضہ حج کی سعادت حاصل کی ہے اور ایرانی حجاج نے بھی سعودی عرب کی جانب سے کیے گئے انتظامات پراطمینان کا اظہار کیا ہے۔ 2015ء میں منیٰ میں بھگدڑ کے افسوس ناک حادثے کے بعد ایرانی عازمین نے پہلی مرتبہ حج کا فریضہ ادا کیا ہے۔ گذشتہ سال ایران نے اپنے شہریوں کو حج کی اجازت نہیں دی تھی۔

ایرانی صدر حسن روحانی نے قبل ازیں یہ کہا تھا کہ اس سال کسی قسم کے ناخوش گوار واقعے سے پاک حج سے تہران اور الریاض کے درمیان دوسرے شعبوں میں بھی اعتماد کی فضا پیدا کرنے میں مدد مل سکتی ہے۔اس مرتبہ ایران نے اپنے عازمین حج کو نیلے رنگ کے برقی شناختی نشان جاری کیے تھے تاکہ منتظمین ان کا سراغ لگا کر ان کی شناخت کرسکیں۔بعض ایرانی حجاج نے برطانوی خبررساں ایجنسی رائیٹرز کے ساتھ گفتگو کرتے ہوئے کہا کہ سعودی حکام نے انھیں بہتر سہولتیں مہیا کی ہیں، انھیں ائیر کنڈیشن خیمے بھی مہیا کیے گئے تھے اور ان سے ہر لحاظ سے اچھا برتاؤ کیا گیا ہے۔ واضح رہے کہ ان میں سے بعض ایرانی ماضی میں بھی حج کی سعادت حاصل کرچکے تھے۔

ایک نظر اس پر بھی

یمن : حوثیوں کے لیے کام کرنے والے ایرانی جاسوس عرب اتحاد کے نشانے پر

یمن میں آئینی حکومت کو سپورٹ کرنے والے عرب اتحاد کے لڑاکا طیاروں نے تعز شہر کے مشرقی حصّے میں جاسوسی کے ایک مرکز کو نشانہ بنایا۔ اس مرکز میں ایرانی ماہرین بھی موجود ہوتے ہیں جو باغی حوثی ملیشیا کے لیے کام کرتے ہیں۔

شاہ سلمان اور صدر السیسی کے درمیان ٹیلیفونک رابطہ

سعودی عرب کے فرمانروا خادم الحرمین الشریفین شاہ سلمان بن عبدالعزیز آل سعود اور مصری صدر عبدالفتاح السیسی کے درمیان ٹیلیفون پر رابطہ ہوا ہے۔ اس موقع پر شاہ سلمان نے مصر کی سلامتی اور استحکام کی خواہش کا اظہار کیا ہے۔

ایران میں رواں سال تین کم سن بچوں کو پھانسی پر لٹکا دیا گیا:یو این

ایران میں کم عمر افراد کو سزائے موت دیے جانے اور ان سزاؤں پر عمل درآمد میں ماضی کی نسبت اضافہ دیکھنے میں آیا ہے۔ اقوام متحدہ کی طرف سے جاری کردہ ایک رپورٹ میں بتایا گیا ہے کہ رواں سال 2018 کے پہلے ڈیرھ ماہ میں ایران میں تین کم عمر افراد کو پھانسی دے کر موت سے ہم کنار کردیا گیا۔