احمدی نژاد کے کاغذات نامزدگی مسترد، روحانی کے منظور
تہران،21اپریل(ایس او نیوز/آئی این ایس انڈیا)ایران کی دستوری کونسل نے سابق صدر محمود احمدی نڑاد کے صدارتی انتخابات کے لیے جمع کرائے کاغذات نامزدگی مسترد کردیے ہیں جب صدر حسن روحانی سمیت چھ اہم شخصیات کے کاغذات منظور کیے گئے ہیں۔ایران کے سرکاری ٹی وی نے الیکشن کمیشن اور دستوری کونسل کے ذرائع کے حوالے سیبتایا ہے کہ آئین کے آرٹیکل 60 کے تحت ملک میں 12 صدارتی انتخابات کے لیے امیدواروں کے کاغذات نامزدگی کی جانچ پڑتال جاری ہے۔دستوری کونسل امیدواروں کی اہلیت کی جانچ پڑتال کے بعد انہیں انتخابات کے لیے اہل یا نا اہل قرار دینے کا عمل جاری رکھے ہوئے ہے۔ گذشتہ روز چھ امیدواروں سد مصطفیٰ آقا میر سلیم، اسحاق جہانگیری کوشائی،حسن روحانی، ابراہیمی رئیسی ساداتی، محمد باقر قالیباف اور مصطفیٰ ھاشمی طبا کے کاغذات نامزدگی منظور کرلیے گئے ہیں۔دستوری کونسل نے سابق صدر محمود احمدی نڑاد، ان کے سابق نائب صدر حمید بقائی اور سابق صدر ہاشمی رفسنجانی کے بھائی محمد ہاشمی کے کاغذات نامزدگی مسترد کردئے گئے ہیں۔خیال رہے کہ ایران میں آئندہ ماہ ہونے والے صدارتی انتخابات کے لیے 1636 امیدواروں نے کاغذات نامزدگی جمع کرائے تھے۔ ان میں سے صرف چھ شخصیات کے نام منظور کیے گئے ہیں۔