کانپور،05؍ ستمبر (ایس او نیوز؍آئی این ایس انڈیا) اتر پردیش کے کانپور شہر ضلع میں حال ہی میں پولس سپرنٹنڈنٹ (مشرقی) کے عہدے پر آئے آئی پی ایس افسر سریندرداس کی بدھ کے روز مشتبہ حالت میں طبیعت بگڑ گئی۔اطلاع ملنے پر انہیں ریجنسی اسپتال میں داخل کیا گیا ہے، جہاں ان کی حالت نازک بنی ہوئی ہے۔اے ڈی جی سمیت کی اعلیٰ افسر اسپتال پہنچ گئے ہیں لیکن کچھ بھی بولنے سے انکار کر رہے ہیں۔

ذرائع کا کہنا ہے کہ ایس پی( مشرقی) نے زہریلا مادہ کھایا ہے۔بنیادی طورپر بلیا کے رہنے والے سریندر داس 2014 بیچ کے آئی پی ایس افسر ہیں اور ایس پی کے عہدے پر ان کی پہلی بار کانپور شہر میں تقرری ہوئی ہے۔ضلع میں آئے ابھی ان کو محض ایک ماہ ہوا ہے۔ وہ بدھ کے روز اپنے گھر میں تھے اور اسی دوران مشتبہ حالت میں ان کی طبیعت خراب ہونے لگی۔ اس پر وہاں موجود اسٹاف نے آناً فاناً میں انہیں ریجنسی اسپتال میں داخل کرایا اوراس سلسلہ میں اعلیٰ افسروں کو مطلع کیا گیا۔اطلاع ملنے پر سینئر ایڈیشنل پولس ڈائریکٹر جنرل اویناش چندر، سینئر پولس سپرنٹنڈنٹ اننت دیو کے ساتھ دیگر پولس سپرنٹنڈنٹ سمیت ضلع انتظامیہ کے اعلیٰ عہدیدار ریجنسی اسپتال پہنچ گئے، لیکن کوئی بھی کچھ بول نہیں رہا ہے۔ ذرائع کا کہنا ہے کہ آئی پی ایس افسر نے زہریلا مادہ کھایا ہے اوران کی حالت نازک ہے۔