احمد آباد، 21؍جون(ایس او نیوز؍آئی این ایس انڈیا )بین الاقوامی یوگا دیوس کے موقع پر یہاں جی ایم ڈی سی میدان میں تقریبا تین لاکھ لوگوں نے یوگ گرو رام دیو کی قیادت میں یوگاکرکے ایک عالمی ریکارڈ بنا یا۔اس موقع پر بی جے پی صدر امت شاہ، گجرات کے وزیر اعلی وجے روپانی، نائب وزیر اعلی نتن پٹیل، سابق وزیر اعلی آنندی بین پٹیل، کئی دیگر لیڈر اور آئی اے ایس افسران نیز ہائی کورٹ کے جج اور افسران موجود تھے۔تیسرے بین الاقوامی یوگا دیوس کے موقع پر رام دیو کی قیادت میں یہاں لاکھوں لوگوں نے یوگاکیا ۔ریاستی حکومت اور رام دیو کے پتنجلی یوگ پیٹھ نے یہ اس پروگرام میں مختلف مذاہب کے مذہبی رہنماؤں کو مدعوکیا تھا۔ڈیڑھ گھنٹے کے سیشن کے بعد رام دیو نے دعوی کیا کہ تین لاکھ لوگوں کے ذریعہ ایک ہی جگہ پر یوگا کرنے سے یہ پروگرام گینز بک آف ورلڈ ریکارڈ میں درج ہو گیا ہے۔پچھلا ریکارڈ 21؍جون 2015کو دہلی میں بنا تھا،اس وقت 35985لوگوں نے راج پتھ پر وزیر اعظم نریندر مودی کے ساتھ یوگا کیا تھا۔آج کی تقریب کے بعد رام دیو نے نامہ نگاروں سے کہاکہ آج کا دن میرے لیے بہت اہم ہے ،کیونکہ تین لاکھ سے زیادہ لوگوں نے ایک نیا عالمی ریکارڈ بنانے کے لیے ایک ہی جگہ پر ایک ساتھ یوگا کیا، ہم نے اس گزشتہ عالمی ریکارڈ کو بڑے فرق کے ساتھ توڑ دیا ہے، جو ہمارے وزیر اعظم کی موجودگی میں بنایا گیا تھا۔ انہوں نے کہا کہ گینز بک آف ورلڈ ریکارڈ کے افسران بھی اس موقع پر موجود تھے۔