سعودی عربیہ کے ریاض کے قریب ہوئے حادثے میں بھٹکلی خاتون زخموں کی تاب نہ لاکر چل بسی
بھٹکل 27/جون (ایس او نیوز) عمرہ کرکے دمام جانے کے دوران ریاض کے قریب پیش آئے ایک سڑک حادثے میں بھٹکل کی ایک خاتون شدید زخمی ہوگئی تھی اور اُسے الگوئیا اسپتال میں داخل کیا گیا تھا، خبر ملی ہے کہ وہ آج زخموں کی تاب نہ لاکر چل بسی ہیں، انا للہ و اناالیہ راجعون۔
ذرائع سے ملی اطلاع کے مطابق بھٹکل علوہ اسٹریٹ کے مولوی عبداللہ اور مولوی عبدالرحمن کی بہن بی بی خدیجہ (40)، اپنی والدہ اور دو بھائیوںاور نندشائقہ شاہ بندری سمیت آٹھ لوگوں کے ایک گروپ کے ساتھ عمرہ کی ادائیگی کے لئے مورخہ 6 جون کو ممبئی سے جدہ گئی تھی، سعودی کے دمام میں ملازمت کرنے والے ان کے شوہر محمد شعیب شاہ بندری اس دوران مکہ ان کے پاس پہنچ گئے۔
عمرہ کی تکمیل کے بعد شوہر محمد شعیب اپنی بیوی بی بی خدیجہ اور اپنی بہن شائقہ شاہ بندری کوساتھ لے کر عید منانے دمام جانے کے لئے نکل پڑے، جبکہ دیگر چھ لوگ مدینہ میں ہی موجود تھے۔ شعیب کے ساتھ کار پر بہنوئی محمد خالد شاہ بندری ، خالد کی اہلیہ شاکرہ، دو بیٹیاں مریم ، فاطمہ اور بیٹا احمد بھی موجود تھے۔اس طرح جملہ آٹھ لوگ دمام کے لئے نکلے تھے کہ ریاض سے قریب 170 کلو میٹر کی دوری پر واقع الگوئیا نامی مقام پر سنیچر شام قریب پانچ بجے ان کی کار بے قابو ہوکر اُلٹ گئی۔ حادثے میں بی بی خدیجہ کو شدید چوٹ لگی تھی، جبکہ محمد خالد صاحب کو بھی کافی چوٹ لگی تھی، البتہ کار پر سوار دیگر سبھی لوگ بالکل محفوظ رہ گئے۔
بتایا گیا ہے کہ بھٹکل سے عمرہ کے لئے گئے ہوئے جملہ آٹھ لوگوں میں چھ لوگ جو مدینہ میں رہ گئے تھے، وہ عید کے بعد دمام جانے والے تھے، جبکہ ان سبھی لوگوں کا 3/ جولائی کو بھٹکل واپس آنے کا پروگرام تھا۔
مرحومہ بی بی خدیجہ کو تین لڑکیوں سمیت جملہ چار بچے ہیں۔
سعودی عربیہ میں بی بی خدیجہ کے انتقال پر بھٹکل کی جماعتوں نے گہرے رنج و غم کا اظہار کیا ہے۔ اللہ رب العزت ان کی بھرپور مغفرت فرمائے اور اہل خانہ کو صبر جمیل عطا فرمائے۔ اٰمین
میت فی الوقت الگوئیا اسپتال میں ہی رکھی گئی ہے، کاغذی کاروائیوں کے بعد گھروالوں کے حوالے کی جائے گی۔
