بنگلورو،19؍جولائی(ایس او نیوز) بنگلور میٹرو ریل کارپوریشن اور انفوسس فاؤنڈیشن نے آج وزیر اعلیٰ ایچ ڈی کمار سوامی کی موجودگی میں شہر کے کونپنا اگراہارا میٹرو اسٹیشن کی تعمیر اور دیکھ بھال کے لئے معاہدے پر دستخط کئے۔ اس مقصد کے لئے انفوسس فاؤنڈیشن نے دو سو کروڑ روپیوں کا عطیہ دینے پر رضامندی ظاہر کی ہے۔

اس موقع پر خطاب کرتے ہوئے کہاکہ شہر بنگلور جس طرح سے پھیل رہا ہے، اسے دیکھتے ہوئے نما میٹرو ضروری ہوگیا ہے۔ میٹرو کے پہلے مرحلے میں 47 کلومیٹر کی خدمات عوام کے لئے کھول دی گئی ہیں۔ دوسرے مرحلے پر کام تیزی سے جاری ہے۔اس پراجکٹ کو کامیاب بنانے کے لئے انفوسس فاؤنڈیشن کی پہل کو وزیراعلیٰ نے سراہتے ہوئے انفوسس فاؤنڈیشن کی چیرپرسن سدھامورتی کو مبارکباد دی اور کہاکہ انفوسس نے اپنے منافع کے قطیر حصے کو عوامی کاز کے لئے صرف کرنے کا جو بیڑہ اٹھایا ہے وہ قابل تعریف ہے ۔

انہوں نے کہاکہ انفوسس کی طرف سے تعلیم اور کینسر کے مریضوں کی مدد کے لئے رقم صرف کی جارہی ہے۔ ریاست کی ترقی میں بھی اس فاؤنڈیشن کی بہت بڑی حصے داری رہی ہے۔ وزیر اعلیٰ نے کہاکہ اس فاؤنڈیشن کی طرف سے جو بھی مدد مل رہی ہے حکومت اس کا بھرپور استعمال کرے گی۔ اس موقع پر ڈاکٹر سدھا مورتی نے کہاکہ انفوسس فاؤنڈیشن کی طرف سے ریاست کی ترقی میں حصے داری کوئی خیرات نہیں بلکہ ریاست کی ترقی کے تئیں انفوسس کی ذمہ داری ہے۔شہر بنگلور میں ٹریفک کے دباؤ کو کم کرنے میں حکومت کی پہل کا انفوسس کی طرف سے بھرپور تعاون کیا جائے گا۔

نائب وزیراعلیٰ ڈاکٹر جی پرمیشور نے اس موقع پر کہاکہ بنگلور نہ صرف براعظم ایشیا بلکہ دنیا کا سب سے تیزرفتاری سے پھیلنے والا شہر ہے ، شہریان بنگلور کو ایک سے دوسرے مقام تک جانے میں جو دشواریاں پیش آرہی تھیں انہیں دور کرنے میں نما میٹرو سب سے بڑی سہولت ثابت ہوئی ہے۔ انہوں نے کہاکہ شہر بنگلور میں ایک سے دوسرے مقام تک جانا انتہائی دشوار گزار مرحلہ بن گیا ہے، میٹرو ریل پراجکٹ کے دوسرے مرحلے کو آگے بڑھانے میں انفوسس فاؤنڈیشن کی طرف سے جو مدد مل رہی ہے وہ قابل ستائش ہے۔

اس موقع پر ریاستی لیجسلیٹیو کونسل چیرمین بسور اج ہوراٹی ، وزیر مالگزاری آر وی دیش پانڈے ، وزیر صنعت کے جے جارج ، وزیر تعمیرات عامہ ایچ ڈی ریونا ، وزیر برائے بہبودئ خواتین واطفال جئے مالا، وزیر پارچہ جات، سارا مہیش ، وزیر شہری رسد وخوراک ضمیر احمد خان ، میئر سمپت راج ، ڈپٹی میئر پدماوتی نرسمہا مورتی ، چیف سکریٹری وجئے بھاسکر ، اڈیشنل چیف سکریٹری مہیندر جین ، میٹرو ریل کارپوریشن کے منیجنگ ڈائرکٹر اجئے سیٹھ، وزیر اعلیٰ کے اڈیشنل چیف سکریٹری ڈاکٹر ای وی رامنا ریڈی، وزیر اعلیٰ کے سکریٹر ی سلوا کمار ، انفوسس فاؤنڈیشن اور بی ایم آر سی یل کے اعلیٰ عہدیدار اس موقع پر موجود تھے۔