نئی دہلی ،19 ؍اگست (ایس او نیوز؍آئی این ایس انڈیا) کشمیر کے بارہمولہ کے اری میں فوج نے نہ صرف دراندازی کی کوشش کو ناکام بنا دیا بلکہ ایک دہشت گرد کوبھی مار گرایا۔اری کے کستوری نالہ کے پاس فوج نے ایل او سی پر مشتبہ حرکت دیکھی۔دراندازی کی کوشش دیکھتے ہوئے جوابی کارروائی میں فوج نے ایک درانداز کو مار گرایا ہے۔

واضح ہو کہ خبر لکھے جانے تک آپریشن جاری ہے۔ہفتہ کو ہی فوج نے کپواڑہ میں دراندازی کی کوشش کر رہے تین دہشت گردوں کو مار گرایا تھا۔کپواڑہ کے تگ دھار سیکٹر میں ہفتہ دوپہر کو فوج نے تین دہشت گردوں کو مار گرایا تھا۔ویسے جمعرات کو فوج کے ڈی جی جموں نے سرحد پر پاکستان کی جانب سے ہو رہے دہشت گردوں کی دراندازی کو لے کر بات کی تھی۔

ہندوستانی فوج کے ڈی جی نے اپنے پاکستانی ہم منصب کو کہا کہ پاکستان کے علاقے میں دہشت گردوں کے لیے پناہ گاہ قائم ہے جو بھارت کے لیے فکر کی بات ہے۔پاکستانی فوج جب تک ایسے عناصر پر لگام نہیں لگائے گی اس وقت تک سرحد پر امن نہیں ہو سکتا۔اگرچہ پاکستانی فوج پہلے کی طرح یہ ماننے کو تیار نہیں ہے کہ اس کی جانب سے دہشت گردوں کی دراندازی ہوتی ہے۔

اس سال لائن آف کنٹرول پاکستان نے 1000 دفعہ سے زیادہ بار 2003 سے جاری جنگ بندی کی خلاف ورزی کر چکا ہے۔جموں و کشمیر میں سکیورٹی فورسز نے دہشت گردوں کے خلاف آپریشن آل آؤٹ کے تحت 125 سے زیادہ دہشت گردہلاک کئے گئے ہیں۔