بنگلورو، 14مارچ (ایس او نیوز؍ یواین آئی ) دلت لیڈر پرکاش امبیڈکر نے آج کہا ہے کہ سیکولر جماعتوں کی ناکامی کے سبب ملک میں فرقہ وارانہ عناصر اپنی جڑوں کو گہرے کررہے ہیں اوریہاں تک کہ ملک کے بیشتر حصوں میں انہوں نے اقتدار بھی حاصل کرلیا ہے ۔بنگلورو میں سیکولر فرنٹ آف انڈیا کی جانب سے منعقدہ ایک ریالی سے خطاب کرتے ہوئے انہو ں نے کہا کہ ڈاکٹر بی آر امبیڈکر کی جانب سے تحریر کردہ ہندوستانی دستور کی مخالفت کرنے والے یہ عناصر دستور کے جذبے کو اکھاڑ پھینکنے کا عزم رکھتے ہیں جس میں تمام مذاہب کے افراد کو مساوی حقوق کا وعدہ کیا گیا ہے ۔انہو ں نے کہا کہ یہ عناصر جنہوں نے ڈاکٹر امبیڈکر کی مخالفت کی تھی ' اب بابائے دستور ہند کی پوجا کررہے ہیں۔ میں دلتوں ' اقلیتوں اور پسماندہ طبقات سے تعلق رکھنے والے افرا دپر زور دیتا ہوں کہ وہ ایسی طاقتوں کے خلاف متحدہ طور پر جدوجہد کا آغاز کریں۔ پرکاش امبیڈکر جو بی آر امبیڈکر کے پوتے ہیں ' نے الزام لگایا کہ فرقہ وارانہ عناصر سلسلہ وار انداز میں ہندو ملک کے منصوبے کے ذریعہ ملک میں رہنے والوں کو غیرمحسوس طور پھر کمزور کررہے ہیں۔ ایسے منصوبوں کو شکست دینی چاہئے ۔