مینگلور یکم ؍ اکتوبر(ایس او نیوز) ایک عجیب  اور غیر معمولی واقعے میں نشے کی حالت میں دھت دو فوجی جوانوں اور ان کے دوستوں نے پولیس والوں پر نہ صرف حملہ کردیا، بلکہ پولیس گاڑی کو بھی نقصان پہنچایا۔ واردات مینگلور سے قریب 82 کلو میٹر کڈبا نامی مقام پر اتوار دیر رات کو  پیش آئی۔

بتایا جاتا ہے کہ ہندوستانی فوج سے منسلک جوان رتناکر اور ہریش سالانہ چھٹی پر گھر آئے ہوئے تھے۔ ان دونوں نے دنیش ، پرشانت اور دیگر ساتھیوں کے ساتھ مل کر شراب کے نشے میں کڈبا پولیس اسٹیشن کے سب انسپکٹر پرکاش دیواڈیگا اور دیگراہلکار شری شئیلا،شیوا پرساد،پٹا سوامی کے علاوہ ہوم گارڈ یوگیش کی پیٹائی کی ہے۔ اس حملے کے دوران پولیس گاڑی کو بھی نقصان پہنچاہے۔ یہ بھی معلوم ہوا کہ نشے کی حالت جانچنے کے لئے جو الکوحل میٹر استعمال ہوتا ہے اسے بھی انہوں نے توڑ پھوڑ کر رکھ دیا۔زخمی پولیس والوں کو کڈبا کمیونٹی اسپتال میں داخل کیا گیا ہے۔ پتور سرکل انسپکٹر نے اسپتال پہنچ کرزخمی پولیس والوں کی عیادت کی ہے۔

موصولہ رپورٹ کے مطابق مردھالاکے قریب چاکوٹے کیرے علاقے میں پولیس افسران رات کے وقت گاڑیوں کی معمول کے مطابق تلاشی لے رہے تھے۔فوجی جوان ہریش اور رتناکر بغیر ہیلمیٹ کے موٹر بائک چلارہے تھے اس لئے پولیس نے ان کو روکا۔اس پر فوجی جوان آپے سے باہرہوگئے اورگالی گلوچ کرتے ہوئے انہوں نے پولیس والوں پر حملہ کردیا۔جب پولیس والے اپنے آپ کو مارپیٹ سے بچانے کی کوشش کررہے تھے توفوجیوں کے دوست دنیش، پرشانت وغیرہ بھی لڑائی میں شامل ہوگئے اور ان سب نے مل کر پولیس افسران کی پیٹائی کردی۔جب معاملہ قابو سے باہر ہوگیا تو اضافی پولیس فورس طلب کی گئی اور4 حملہ آوروں کو گرفتار کرلیاگیا۔پتہ چلا ہے کہ اس مار پیٹ کی وجہ سے پولیس اہلکار شری شئیلا کے سر پر چوٹ آئی ہے جبکہ پٹا سوامی کا دانت ٹوٹ گیا ہے۔