بنگلورو،25؍اگست(ایس او نیوز) سابقہ سدا رامیا حکومت نے اس خالص مقصد کے تحت اندرا کینٹین شروع کئے تھے کہ غریب عوام کو معیاری کھانا فراہم کیا جائے، لیکن بد قسمتی سے شہر کے کچھ لوگوں کے لئے یہ کینٹین نہ صرف پیٹ کی آگ بجھانے کے ذریعہ ہیں بلکہ آسانی کے ساتھ برتن وغیرہ چرانے کے بھی مقامات بنے ہوئے ہیں۔
حالانکہ یہ بات حیرت انگیز ہے مگر حقیقت بھی ہے کہ نہ صرف شہر بنگلور بلکہ ریاست کے مختلف مقامات پر قائم 168 اندرا کینٹینوں میں سے پچھلے ایک سال کے دوران بیس لاکھ روپئے مالیت کے اسپون، پلیٹ اور گلاس وغیرہ چوری کئے گئے ہیں۔ذرائع سے حاصل شدہ تفصیلات کے مطابق پچھلے ایک سال کے دوران اندرا کینٹینوں سے ایک لاکھ پچاس ہزار اسپون اور دس ہزار پلیٹیں چوری کی گئی ہیں، ان میں سے ہر ایک اسپون کی قیمت پندرہ روپئے اور پلیٹ پچاس روپئے کی ہوتی ہے۔ایک اندازے کے مطابق ان کینٹنوں میں اوسطاً روزانہ دو لاکھ پندرہ ہزار افراد کو کھانا فراہم کیا جاتا ہے اور ایک سال کے دوران تقریباً چھ کروڑ افراد نے ان کینٹینوں میں معیاری کھانے کا لطف اٹھایا ہے۔اکثر شہر کی ایک اندرا کینٹین سے کھانا کھانے والے ایک شخص نے کہا کہ ’’لیکن یہ بات افسوس ناک ہے کہ معاشرہ کا ایک طبقہ ایسا بھی ہے جو حکومت کے نیک ارادوں کو سمجھنے سے بھی قاصر ہوتا ہے اور وہ لوگ چوری کے عمل کے ذریعہ حکومت کے اقدامات کی توہین کر تے ہیں‘‘۔