ریل اسپتال" لائف لائن ایکسپریس "کی کمٹہ میں آمد
کمٹہ، 23؍اکتوبر (ایس او نیوز)دیہی اور مضافاتی عوام کو اعلیٰ پیمانے کی طبی امداد فراہم کرنے کے لئے ملک بھر میں اپنا سفر جاری رکھنے والا انتہائی جدید سہولتوں سے آراستہ" لائف لائن ایکسپریس "نامی ریل اسپتال کمٹہ ریلوے اسٹیشن کے پاس پہنچ گیا ہے۔ریلوے پٹری پر چلنے والایہ دنیا کا پہلاموبائل اسپتال ہے جس میں ہر قسم کی بیماریوں کی تشخیص اور علاج کے علاوہ سرجری کے لئے بھی تمام تر جدید آلات کے ساتھ ماہر ڈاکٹروں کی خدمات حاصل کرنے کا انتظام ہے۔
موصولہ رپورٹ کے مطابق 30اکتوبر سے کمٹہ اور اطراف کے عوام کے لئے اس اسپتال میں علاج و معالجے کی خدمات انجام دی جائیں گی۔ اس کے لئے ضروری کارروائیاں انجام دی جارہی ہیں۔آنکھ ناک اور کان کے امراض کے علاوہ امراض قلب اور دوسری بیماریوں کی تشخیص اور علاج کی سہولت فراہم کی جائے گی۔ اس ریل اسپتال سے ساحلی علاقے کے عوام کو جدید طبی سہولتوں سے فائدہ اٹھانے کا ایک سنہرا موقع حاصل ہوگا۔