بیرون ملک میں ہندوستانیوں نے منایا یوم جمہوریہ
بیجنگ / سنگاپور، 26جنوری(ایس او نیوز؍آئی این ایس انڈیا)ملک کے ساتھ ساتھ بیرون ملک بھی ہندوستان کے 69 ویں یوم جمہوریہ کا جشن منایا گیا۔ چین میں بھارت کے سفیر گوتم بباولے نے بیجنگ واقع سفارت خانے میں ترنگا لہرایا اور صدر رام ناتھ کووند کا ملک کے نام پیغام پڑھ کر سنایا ۔ اس کے بعد وہاں ایک ثقافتی پروگرام کا انعقاد کیا گیا۔ پروگرام میں 300 سے زائد بھارتی تارکین وطن اور بھارتی سفیروں نے شرکت کی۔ جکارتہ میں واقع بھارتی سفارت خانے میں بھی آج یوم جمہوریہ منایا گیا۔ چارج ڈی افیئرزپرکاش گپتا نے سفارت خانے میں ہندوستانی شہریوں اور بھارتی تارکین وطن کی موجودگی میں ترنگا لہرا کرملکی جوش و جذبہ کے ساتھ یوم جمہوریہ کا جشن منایا۔ با لی اور میڈن میں بھی بھارتی قونصل خانے میں یوم جمہوریہ کا جشن منایا گیا۔ سنگاپور میں قائم مقام ہائی کمشنر ایس پانڈے کے ساتھ 600 سے زائد ہندوستانیوں نے یوم جمہوریہ منایا۔ دیش پانڈے نے صدر کی تقریر بھی پڑھ کر بھارتی تارکین و طن کو سنایا۔ بھارتی اسکولوں کے طلبا نے حب الوطنی کے گیت بھی گائے۔ ہائی کمشنر نے کمیونٹی کے لئے ایک تقریب بھی منعقد کیا۔