پاکستان کی تعریف کرنے کیلئے اداکارہ کے خلاف غداری کی شکایت
بنگلور،23اگست؍(ایس او نیوز/آئی این ایس انڈیا)اداکارہ سے لیڈر بنی رامیا کے خلاف عدالت میں شکایت داخل کرکے ان کے خلاف غداری سمیت دیگر الزامات کو لے کر کارروائی کرنے کا مطالبہ کیا گیا ہے۔دراصل رامیا نے تبصرہ کیا تھا کہ ’’پاکستان جہنم نہیں ہے‘‘اور شکایت کنندہ کا کہنا ہے کہ اس سے’’ دیش بھکتوں‘‘ کی توہین ہوئی ہے۔اس تبصرے کی وجہ سے سوشل میڈیا پر رامیا کی کافی تنقید ہوئی تھی اور بی جے پی اور اے بی وی پی کے کارکنوں نے ان کے تبصرے کو ملک مخالف قرار دیا تھا،اگرچہ آج بنگلور میں رامیا اپنی بات پر قائم رہیں۔شکایت میں عدالت سے پولیس کو یہ ہدایات دینے کا مطالبہ کیا گیا ہے کہ سابق کانگریسی ممبر پارلیمنٹ رامیا کے خلاف آئی پی سی کی دفعہ( 124اے) غداری ، (344)10 یا زیادہ دنوں تک غلط طریقے سے یرغمال بنانااور (511اس طرح جرم کرنے کی کوشش کرنے کے لئے جرمانا جن میں عمر قید یا دیگر قید کی سزا کا قانون ہو)کے تحت مقدمہ درج کیا جائے۔ایڈووکیٹ کے وٹھل گوڑا نے سومورپیٹ کے فرسٹ کلاس عدالتی مجسٹریٹ کی عدالت میں یہ شکایت داخل کی تھی۔عدالت نے کل یہ شکایت قبول کر لی۔اس معاملے میں 27اگست کو سماعت ہوگی۔شکایت میں گوڑا نے الزام لگایا ہے کہ اداکارہ نے پاکستان کی تعریف کرکے ہندوستان کی توہین کی ہے اور لوگوں کو بھڑکایا ہے۔رامیا حال ہی میں نوجوان ممبران پارلیمنٹ کے سارک وفد کے ساتھ اسلام آباد گئی تھیں۔رامیا نے ماڈیا میں ایک اجتماع میں کہا کہ پاکستان جہنم نہیں ہے، وہاں کے لوگ بھی بالکل ہماری طرح ہی ہیں۔انہوں نے ہماری خوب مہمان نوازی کی۔