ہندوستان نے جنوبی کوریا کے شہریوں کے لیے’’ویزاآن ارائیول‘‘ کی سہولت شروع کی
نئی دہلی،09؍ دسمبر (ایس او نیوز؍آئی این ایس انڈیا) ہندوستان نے جنوبی کوریا کے شہریوں کے لئے آمد ویزاسہولت متعارف کرایا ہے،اس قدم سے سیاحوں اور کاروباری لوگوں کی تعدادمیں اضافے کاامکان ہے۔حکام نے اتوار کو یہ معلومات دی۔جاپان کے بعد جنوبی کوریا دوسرا ملک ہے جس کے شہریوں کو اب ہندوستان ’’ ویزاآن ارائیول ‘‘کی سہولت فراہم کررہاہے۔جاپانی شہری مارچ 2016سے یہ سہولت حاصل کر رہے ہیں۔وزارت داخلہ کے ایک اہلکار نے کہا کہ ہندوستان نے جنوبی کوریا کے شہریوں کو یہ سہولت فراہم کرنے کا فیصلہ کیا ہے۔یہ سہولت یکم اکتوبر 2018سے مؤثر ثابت ہوئی ہے۔جاپانی شہریوں کی طرح جنوبی کوریا کے شہریوں کوبھی دہری انٹری کی اجازت بھی دی جاتی ہے،تاہم سفر 60دن سے زیادہ نہیں ہونا چاہئے۔کاروبار، سیاحت، کانفرنس یا طبی مقصد سے آنے والے جنوبی کوریا کے شہری اس سہولت کا فائدہ لے کر چھ مخصوص بین الاقوامی ہوائی اڈوں دہلی، ممبئی، چنئی، کولکاتہ، بنگلور اور حیدرآباد سے ملک میں داخل ہو سکتے ہیں۔ایک تخمینہ کے مطابق ہر سال جنوبی کوریائی شہریوں کو تقریبا دو لاکھ ہندوستانی ویزا دیا جاتا ہے، ان میں سے 80فیصد سیاح ہوتے ہیں،ہر روز اوسطا 600جنوبی کوریائی شہری دہلی آتے ہیں۔حالانکہ اس سے پہلے ’’ ویزاآن ارائیول‘‘سہولت کی پیشکش 12ممالک کمبوڈیا، فن لینڈ، انڈونیشیا، جاپان، لاؤس، لکزمبرگ، میاماں، نیوزی لینڈ، فلپائن، سنگاپور، ویت نام اور جنوبی کوریا کو کی گئی تھی لیکن ’ای ٹورسٹ ویزا‘کی منصوبہ بندی کے بعد نومبر 2014میں اسے بند کر دیا گیا تھا۔’ای ٹورسٹ ویزا‘سہولت میں اب 166ممالک شامل ہیں اور غیر ملکی شہری سیاحت، کاروبار، صحت، طبی اور کانفرنس کا مقصدسے 72گھنٹے کے اندر آن لائن ویزا حاصل کر سکتے ہیں۔