ملک میں تجارت نہیں زراعت کو آسان بنانے کی ضرورت: دیوے گوڈا
بنگلورو،30؍نومبر(ایس او نیوز) سابق وزیراعظم اور جے ڈی ایس کے قومی صدر ایچ ڈی دیوے گوڈا نے مرکزی حکومت کی طرف سے کسانوں کے مسائل کو نظر انداز کرنے پر افسوس کا اظہار کرتے ہوئے کہاہے کہ جو حکومت کسانوں کے مسائل نہیں سمجھتی وہ کبھی باقی نہیں رہے گی۔
قرضوں کی معافی، فصل کے عوض بہتر تائیدی قیمتوں کا تعین اور دیگر مسائل کی یکسوئی پر زور دینے کے لئے ملک بھر کے کسانوں کے لئے دہلی میں جاری احتجاج کی حمایت کرتے ہوئے دیوے گوڈا نے ان کی ریلی میں شرکت کی اور وہاں خطاب کرتے ہوئے ان کسانوں کو یقین دلایا کہ جے ڈی ایس کسانوں کی تحریک کے ساتھ ہے۔
انہوں نے کہاکہ پچھلے ساڑھے چار سال کے دوران مرکزی حکومت نے کسانوں کے کسی بھی مسئلے پر توجہ نہیں دی، ہر بار مرکزی حکومت کو متوجہ کرانے کے لئے کسانوں نے جو آواز دی اس پر کوئی توجہ نہیں دی گئی۔ وزیر اعظم مودی پر نکتہ چینی کرتے ہوئے انہوں نے کہا کہ ہزاروں کی تعداد میں کسانوں نے قرضوں کے بوجھ کی وجہ سے خود کشی کرلی۔ لیکن ان کا مرکزی حکومت میں کوئی پرسان حال نہیں۔ دہلی کے رام لیلا میدان میں ہزاروں کی تعداد میں کسان کل سے احتجاج پر ہیں۔آج ان لوگوں نے پارلیمان کی طرف اپنے مارچ کی شروعات کی، دیوے گوڈا نے کہاکہ کرناٹک میں کانگریس جے ڈی ایس مخلوط حکومت غالباً ملک کی پہلی حکومت ہے جس نے کسانوں کے تمام قرضے معاف کردئے ہیں۔
انہوں نے کہاکہ وزیر اعظم مودی بارہا تاجروں کو آسانی فراہم کرنے کی باتیں کرتے ہیں، دراصل اس ملک میں جس کی معیشت کا 70 فیصد حصہ زراعت پر مبنی ہے، یہاں زراعت میں آسانیاں فراہم کرنی چاہئے، لیکن مرکزی حکومت نے اس پر کوئی توجہ نہیں دی۔ دیوے گوڈا نے کہاکہ انہیں اپنے بیٹے کمار سوامی پر فخر ہے کہ اپنے قول کے مطابق کسانوں کے قرضے معاف کرنے میں کامیاب رہے۔
