ہندوستان کا پلڑا پاکستان پر بھاری ہوگا:فلیمنگ
ممبئی،3؍جون(ایس او نیوز؍آئی این ایس انڈیا)نیوزی لینڈ کے سابق کپتان اسٹیفن فلیمنگ کا خیال ہے کہ وراٹ کوہلی کی قیادت والی ہندوستانی ٹیم کا پلڑا روایتی حریف پاکستان پر بھاری ہوگا جب دونوں ٹیمیں کل چیمپئنز ٹرافی کے پہلے میچ میں ایک دوسرے کے آمنے سامنے ہوں گی۔فلیمنگ نے کہاکہ ہندوستان کے پاس بہترین تجربہ کار کھلاڑی ہیں جبکہ پاکستان باصلاحیت ہے لیکن ان کے بارے میں کوئی قیاس نہیں لگایا جا سکتا۔انہوں نے کہا کہ پاکستانی ٹیم نوجوان ہے اور مسلسل اچھی کارکردگی کا مظاہرہ نہیں کر سکی ہے۔ہندوستانی ٹیم میں استحکام ہے اور کھلاڑی طویل وقت سے ساتھ کھیل رہے ہیں۔انہوں نے کہاکہ ہندوستان خطاب کے مضبوط دعویداروں میں سے ہے۔ہندوستان کے علاوہ انگلینڈ، جنوبی افریقہ اور آسٹریلیا بھی ٹاپ4 میں رہیں گے۔فائنل میں پہنچنے والی ٹیمیں کون سی ہوں گی، یہ پوچھنے پر انہوں نے انگلینڈ اور جنوبی افریقہ کا نام لیا۔ہندوستانی کھلاڑیوں کی تعریف کرتے ہوئے انہوں نے کہا کہ میں نے حال ہی میں انہیں آئی پی ایل میں دیکھا ہے،جسپریت بمرا اورہاردک پانڈیا عمدہ کھلاڑی ہیں۔ان کے علاوہ شکھر دھون، وراٹ کوہلی، ایم ایس دھونی، آر اشون اور روندر جڈیجہ جیسے کھلاڑی بھی ٹیم میں ہے جن کے پاس تجربہ ہے۔