بین الاقوامی ثالثی کا مرکز بن رہا ہے ہندوستان: چیف جسٹس
نئی دہلی، 22 اپریل(ایس او نیوز؍آئی این ایس انڈیا)ہندوستان کے چیف جسٹس جے ایس کھیہر نے آج کہا کہ ہندوستان بین الاقوامی ثالثی کا ایک مرکز بن رہا ہے اور اس عمل میں بالکل مداخلت نہ کرنے کی حکومت کی پہل غیر ملکی تاجروں میں اعتماد کو بڑھائے گی۔چیف جسٹس نے کہا کہ غیر ملکی سرمایہ کاری کے سبب بین الاقوامی ثالثی کا امکان بڑھ رہا ہے۔دو روزہ ’’اینگوزنگ ایشیا ثالثی سمٹ‘‘ میں چیف جسٹس نے کہا کہ ’’میک ان انڈیا‘‘منصوبہ ملک کو ابھرتی ہوئی مارکیٹوں کے درمیان ایک پسندیدہ مارکیٹ بنائے گی۔انہوں نے کہاکہ ہندوستان کی حکومت میں منصوبہ بندی کی اعلی ترین سطح پر اس سمت میں کوششیں جاری ہیں کہ بین الاقوامی ثالثی کے عمل میں حکومت یا اس کی ایجنسیوں کا دخل نہ رہے۔ حکومت کی جانب سے بالکل مداخلت نہ ہونے سے ہندوستان میں غیر ملکی تاجروں کو لگے گا کہ یہاں عمل منصفانہ ہے۔ انہوں نے کہا کہ مجھے لگتا ہے کہ اس سے ملک میں ثالثی میں تاجروں کا اعتماد بڑھے گا۔ چیف جسٹس نے کہا کہ ہندوستان کے پاس بڑی تعداد میں وکیل اور ثالث ہیں اور ایشیا میں بین الاقوامی تجارتی ثالثی کا مستقبل ہندوستان سے جوڑناضروری ہے۔