ہندوستان میں عدمِ تحمل میں ہورہا ہےاضافہ ، شہریوں کی حفاظت کو بنایا جائے یقینی:امریکہ
واشنگٹن، 30؍جولائی (ایس اونیوز/آئی این ایس انڈیا )امریکہ نے ہندوستان میں بڑھتے عدم تحمل اور تشددپر تشویش کا اظہار کرتے ہوئے حکومت ہند سے مطالبہ کیا ہے کہ شہریوں کے تحفظ اور مجرموں کو سزا دلانے کے لیے وہ ہر ممکن کوشش کرے۔ہندوستان میں بیف کا استعمال کرنے والے لوگوں کے خلاف مبینہ تشدد کے واقعات اور مدھیہ پردیش میں بھینس کا گوشت لے جا رہی ہے دو مسلم خواتین کے ساتھ مار پیٹ کے واقعہ سے جڑے سوالوں کا جواب دیتے ہوئے امریکی محکمہ خارجہ کے ترجمان جان کربی نے کہاکہ سبھی طرح کے عدمِ برداشت سے مقابلہ کرنے اور مذہبی اور اظہار رائے کی آزادی کو برقرار رکھنے کی کوشش میں ہم ہندوستانی حکومت اور شہریوں کے ساتھ ہیں۔انہوں نے کہاکہ تشدد اور عدم تحمل کی خبروں سے ہم واقعی فکر مند ہیں، ایسے مسائل کا سامنا کر رہے دنیا بھر کے ممالک کی حکومتوں سے ہم زور دے کر کہتے ہیں وہ مجرموں کو سزا دلوانے اور شہریوں کو تحفظ فراہم کرنے کے لیے ہر ممکن کوشش کریں۔کربی نے کہا کہ ہندوستانی شہریوں کے متحمل خیالات کو پوراکرنے کے لیے امریکہ ان کے ساتھ مل کر کام کرنے کے لیے تیارہے ،کیونکہ ہندوستان اورامریکہ دونوں کے مفادات میں ہے ۔قابل ذکرہے کہ اس ہفتے کی شروعات میں مدھیہ پردیش کے مندسور میں ریلوے اسٹیشن پر گؤرکشا کمیٹی کے کارکنوں نے گائے کا گوشت ہونے کے شبہ میں دو مسلم خواتین کی پولیس کی موجودگی میں پٹائی کردی تھی، حالانکہ متاثرہ خواتین کے پاس جو گوشت تھا، وہ بھینس کا تھا، پولیس نے دونوں خواتین کو گرفتار کر لیا تھا۔اس سے پہلے گجرات میں بھی اسی قسم کا واقعہ رونما ہوا تھی، جس میں خود ساختہ گؤ رکشاکے کارکنوں نے مردہ گائے کی کھال اتارنے کے معاملے میں دلت نوجوانوں پر حملہ کردیا تھا۔