بنگلورو:18/مئی(ایس او نیوز) اب تک کانگریس کے مختلف لیڈروں اور دیگر سیاسی جماعتوں کے ٹھکانوں پر دھاوے بولنے میں مصروف محکمہئ انکم ٹیکس کے افسران کی نگاہ آج ریاست کے ایک سرکردہ بی جے پی لیڈر پر بھی پڑ گئی۔ محکمہئ انکم ٹیکس نے آج صبح تملناڈو کی راجدھانی چنئی کے کمباکونم میں ایک اور بی جے پی لیڈر ڈنڈا پانی کے گھر پر بھی چھاپہ مارا، اوروہاں سے پانچ سو اور ہزار روپیوں کے ممنوعہ 45لاکھ روپیوں کے نوٹ ضبط کرلئے، اس کے فوری بعد ریاست کی انکم ٹیکس ٹیم نے سابق مرکزی وزیر اور داونگیرے کے رکن پارلیمان جی ایم سدیشور کے ٹھکانوں پر بیک وقت داونگیرے اور چترادرگہ میں چھاپے مارے اور ان کے پاس سے دستاویزات ضبط کرکے ان کی جانچ شروع کردی۔ محکمہئ انکم ٹیکس کے افسران نے سدیشور کی ملکیت والے اثاثوں کی تفصیلات، دستاویزات وغیرہ برآمد کئے۔ جی ایم سدیشور کے ٹھکانوں پر انکم ٹیکس کے چھاپے دیر شام تک بھی جاری رہے۔ بتایاجاتا ہے کہ ان کے پاس سے اثاثوں کے بے شمار دستاویزات ضبط کئے گئے۔ مرکز میں بی جے پی کے اقتدار پر آنے کے بعد یہ پہلا موقع ہے کہ بی جے پی کے قائدین کو انکم ٹیکس نے نشانہ بنایا ہے۔