بنگلورو،23؍اگست(ایس او نیوز) متعدد کانگریس لیڈروں کے ٹھکانوں پر انکم ٹیکس کے چھاپوں کا سلسلہ چلانے کے بعد اب ایسا لگتا ہے کہ جنتادل (ایس) لیڈروں کی باری ہے۔

اس سلسلے کی پہلی کڑی کو آگے بڑھاتے ہوئے آج انکم ٹیکس محکمے کے افسروں نے وزیراعلیٰ ایچ ڈی کمار سوامی کو ہی شاید اپنا پہلا نشانہ بنایا ہے۔ آج انکم ٹیکس افسروں نے وزیر اعلیٰ ایچ ڈی کمار سوامی کے چارٹرڈ اکاؤنٹنٹ کے گھر اور دفتر پر بیک وقت چھاپہ مارا۔

کمار سوامی اور دیگر اہم سیاست دانوں اور اہم شخصیتوں کی آڈٹ کرنے والے چارٹرڈ اکاؤنٹنٹ ایچ بی سنیل کے دفتر اور ان کے گھر پر آج صبح سویرے انکم ٹیکس افسروں کی ٹیم نے دھاوا بولا، کمار ا پارک میں واقع سنیل کے گھر پر انکم ٹیکس افسروں کی طرف سے چھاپوں کا سلسلہ جاری رہا۔ بتایاجاتاہے کہ سنیل کے گھر پر پچھلے تین ماہ کے دوران یہ دوسرا چھاپہ ہے۔ انتخابات کے دوران بھی محکمۂ انکم ٹیکس نے سنیل کے ٹھکانے پر چھاپہ ماراتھا۔