گلبرگہ میں پولیس کمشنرئیٹ دفتر کے قیام کا دیرینہ خواب شرمندہ ء تعبیر،دفتر کے لئے درکار اسٹاف کا ترجیحی بنیادوں پر تقرر کیا جائے گا: وزیر داخلہ ایم بی پاٹل
گلبرگہ25؍فروری(ایس او نیوز) پولیس کمشنرئیٹ گلبرگہ کے لئے عنقریب کمشنر اور ڈپٹی کمشنروں کے تقررات عمل میں لائے جائیں گے۔یہ اعلان وزیر داخلہ کرناٹک مسٹر ایم بی پاٹل نے ہفتہ کے دن قدیم انسپیکٹر جنرل کی عمارت میں پولیس کمشنرئیٹ ، گلبرگہ کے دفتر کا افتتاح کرنے کے بعد رنگ مندر گلبرگہ میں منعقدہ ایک تقریب سے خطاب کرتے ہوئے کیا ۔
وزیر موصوف نے کہا کہ گلبرگہ پولیس کمشنرئیٹ کے لئے مطلوبہ اسٹاف کا ترجیحی بنیادوں پر تقرر کیا جائے گا۔ انھوں نے کہا کہ جرائم کی شرح کو کم سے کم تر کرنے کو ترجیح دی جائے گی ۔ پولیس نظم و ضبط برقرار رکھنے کے لئے نہایت اہم کردار ادا کرتی ہے۔سائیبر جرائم کی روک تھام کے لئے گلبرگہ کمشنرئیٹ میں سائیبر سیکیوڑیٹی سیل قائم کیا جائے گا۔
وزیر داخلہ ایم بی پاٹل نے جب اپنی تقریر جاری رکھتے ہوئے کہا کہ سابق مرکزی وزیر داخلہ ایل کے اڈوانی نے علاقہ حیدر آباد کرناٹک کی پس ماندگی کے خاتمہ کے لئے اسے خصوصی موقف عطا کرنے کی تجویز کو قبول کرنے سے انکار کردیا تھا لیکن بعد میں کانگریسی قائد ڈاکٹر ملیکارجن کھرگے نے اپنی جہد مسلسل اور موثر نمائیندگی کے سبب علاقہ حید ر آباد کرناٹک کو خصوصی مراعات دلانے کے لئے اس علاقہ کے حق میں دستور ہند کی مراعاتی دفعہ 371J کو پورلیمینٹ میں منظور کروایا۔ مسٹر پاٹل کے اس بیان پر بی جے پی کے رکن قانون ساز کونسل مسٹر بی جی پاٹل بھڑک اٹھے اور انھوں نے کہاکہاس طرح کی بات کرنے کا کیا یہ موقع ہے تو جواب میں وزیر موصوف نے معافی مانگ لی۔
اس موقع پر ضلع انچارج وزیر گلبرگہ مسٹر پریانک کھرگے نے وزیر داخلہ سے اپیل کی کہ نئے کمشنرئیٹ کے دفتر میں سائیبر سیکیوریٹی سیل ،سائیبر اینڈ ڈجیٹل فارینسک ٹریننگ سیل جلد از جلد قائم کئے جائیں۔ انھوں نے اس بات پر مسرت کا اظہار کیا کہ وزیر داخلہ ایم بی پاٹل محکمہ داخلہ میں زیادہ سے زیادہ اصلاحات لانے کی کوشش کررہے ہیں ۔
رکن اسمبلی گلبرگہ شمال محترمہ کنیز فاطمہ قمر الالسلام ، رکن اسمبلی گلبرگہ جنوب دتاتریہ پاٹل ریوور، ارکان اسمبلی راج کمار پاٹل تیلکور، بسوراج متی مڑو، ایم وائی پاٹل ، ایم ایل سی بی جی پاٹل مئیر مل اماں والکیری، ضلع پنایت کی نائب صدر شوبھا سرسگی، شمال مشرقی رینج کے انسپیکٹر جنرل آف پولیس منیش کربھیکر، ڈی آئی جی ٹریننگ پدم کمار گرگ، ڈپٹی کمشنر آر وینکٹیش کمار، تبادلہ پر جانے والے سپرینٹینڈینٹ آف پولیس این ششی کمار اور دیگر نے اس پروگرام میں شرکت کی ۔