خاتون سے مبینہ اجتماعی آبروریزی اور تیزاب پھینکے جانے کے معاملے میں 2 سپاہی معطل
کانپور، 27؍اگست(ایس او نیوز/آئی این ایس انڈیا)ریلوے اسٹیشن کے قریب ایک خاتون کے ساتھ مبینہ طورپر عصمت دری کرنے اور اس کے چہرے کو تیزاب سے جلانے کے معاملے میں علاج فراہم کرانے میں لاپرواہی برتنے پر کانپور پولیس کے ایس ایس پی نے آج کلکٹر گنج پولیس اسٹیشن کے دو سپاہیوں کو معطل کر دیا۔حالانکہ اس معاملے میں ابھی تک کوئی گرفتاری نہیں ہوسکی ہے۔متاثرہ خاتون کی حالت نازک بتائی جارہی ہے۔غور طلب ہے کہ کانپور ریلوے اسٹیشن کے قریب جھگی جھونپڑیوں میں تین لوگوں نے کل الہ آباد کی ایک خاتون کے ساتھ مبینہ طور پر عصمت دری کی تھی ۔اس کے بعد اس خاتون کے چہرے پر تیزاب ڈال کر اسے ریلوے کی پٹریوں کے کنارے پھینک دیا تھا ۔پولیس نے مقدمہ درج کرکے خاتون کو اسپتا ل میں بھرتی کرا دیا ہے جہاں اس کی حالت نازک بنی ہوئی ہے، اس کی ایک آنکھ کافی زخمی ہے۔خاتون چونکہ زخمی ہونے کی وجہ سے بول نہیں پا رہی ہے اس لیے پہلے اس نے اشاروں میں بتایا کہ وہ ٹرین سے الہ آباد سے کانپور آ رہی تھی تبھی اس کے ساتھ یہ وحشیانہ عمل ہوا۔تاہم بعد میں اس نے ریلوے اسٹیشن کے قریب جھگی میں رہنے کے دوران اپنے ساتھ عصمت دری کئے جانے کی بات کہی۔کانپور کے ایس ایس پی شلبھ ماتھر نے بتایا کہ اس خاتون کے ساتھ عصمت دری ہوئی ہے یا عصمت دری کی کوشش کی گئی تھی ، اس بات کی تصدیق میڈیکل رپورٹ آنے کے بعد ہی ہو سکے گی۔ابھی خاتون کا چہرہ بری طرح جھلسا ہوا ہے اس لیے پہلے اس کا علاج کیا جا رہا ہے۔پولیس کے مطابق خاتون کو علاج کے لیے اسپتا ل پہنچانے میں تاخیر اور لاپرواہی برتنے کے الزام میں کلکٹرگنج پولیس اسٹیشن کے دو سپاہی مہندر یادو اور سشیل کمار کو آج معطل کر دیا گیا۔