ناقص تعمیر کے باوجود کینسر انسٹی ٹیوٹ کا افتتاح طبی اور صحت کی خدمات سے کھلواڑ: یوگی
لکھنؤ، 22 اپریل(ایس او نیوز؍آئی این ایس انڈیا)اتر پردیش کے وزیر اعلی یوگی آدتیہ ناتھ نے دارالحکومت میں کینسر انسٹی ٹیوٹ کی ادھوری تعمیر کے باوجود افتتاح پر ناراضگی کا اظہار کرتے ہوئے کہا ہے کہ یہ طبی اور صحت کی خدمات کے ساتھ کھلواڑ ہے۔یوگی نے یہاں طبی تعلیم محکمہ کے ایک پروگرام میں کل دیر رات کہا کہ لکھنؤ کے چک گنجریا میں واقع کینسر انسٹی ٹیوٹ کی آدھی ادھوری تعمیر کے باوجود افتتاح کر دیا گیا۔ کینسر جیسی سنگین بیماری کے علاج کے لئے بغیر پوری تیاری اور بندوبست کے افتتاح کرنا صحت اور طبی خدمات کے ساتھ کھلواڑ جیسا ہے۔ انہوں نے کہا کہ کینسر انسٹی ٹیوٹ کی طرف سے فراہم کی جا رہی خدمات تفتیش کا موضوع ہے۔ انہوں نے سرکاری میڈیکل کالجوں اور اداروں کو کنگ جارج میڈیکل یونیورسٹی لکھنؤ اور اتر پردیش انسٹیٹیوٹ یونیورسٹی، سیفئی، اٹاوہ سے وابسطہ کرنے کے لئے سنجیدگی سے کام کرنے کی ہدایت کی۔
ریاست میں ڈاکٹروں اور طبی اساتذہ کی کمی کا حوالہ دیتے ہوئے وزیر اعلی نے کہا کہ بہتر صحت کی سہولیات کے لئے اس کمی کو ہر حال میں پورا کرنا ضروری، اس کمی کو دور کرنے کے لئے کام کی منصوبہ بندی بنائی جائے۔انہوں نے کہا کہ یہ ہم سب کے لئے تشویش کا موضوع ہے کہ دیہی اور دور دراز کے علاقوں اور چھوٹے قصبوں میں قابل ڈاکٹروں کی کمی ہے۔ ڈاکٹروں کی توجہ شہروں اورسہولیات کی طرف رہتی ہے، جن سے انہیں نجات پانا ہوگا، انہیں یہ سوچنا چاہئے کہ جس سماج اور ملک نے انہیں ڈاکٹر بنانے میں مدد کی ہے، وہ اس سماج کو کیا دے رہے ہیں۔ اس سلسلے میں انہوں نے تعلیم مکمل کرنے کے بعد ڈاکٹروں کو دو یا تین سال دیہی یا دور دراز کے علاقوں میں خدمات فراہم کئے جانے کی بات کہی۔