میراآخری الیکشن، پرکاش سنگھ بادل کو گھر میں ہراؤں گا;امریندر سنگھ نے کجریوال کودیالانبی سے الیکشن لڑنے کا چیلنج
پٹیالہ، 17جنوری(ایس او نیوز/آئی این ایس انڈیا)پنجاب ریاستی کانگریس صدر کیپٹن امرندر سنگھ نے منگل کو پٹیالہ شہری نشست سے کاغذات نامزدگی داخل کیا۔امریندرسنگھ دوسیٹوں سے الیکشن لڑ رہے ہیں،وہ لانبی نشست سے وزیراعلیٰ پرکاش سنگھ بادل کے خلاف میدان میں ہیں۔امریندرنے کہاکہ وہ پٹیالہ شہری اور لانبی دونوں اسمبلی حلقوں سے الیکشن لڑ رہے ہیں۔ کیونکہ انہوں نے پٹیالہ سے اپنے سیاسی سفرکاآغازکیا تھا اور اس سفر کو وہیں ختم کرنا چاہتے ہیں۔امریندر نے لانبی کو اپنی کرم بھومی قرار دیتے ہوئے کہا کہ وہ وہاں بادل خاندان کو اس کی بربریت اور ظلم کے لئے سبق سکھائیں گے جو انہوں نے گزشتہ 10سال میں پنجاب کے لوگوں پر کئے ہیں۔پریس کانفرنس میں امرندر نے بی جے پی-اکالی دل پر جم کر حملہ بولا۔اکالی دل کی طرف اشارہ کرتے ہوئے امرندر نے کہا کہ ہمارے یہاں ایک خاندان کو ایک نشست دی گئی ہے، لیکن وہاں تو پورا خاندان لڑ رہا ہے۔امرندر نے کہاکہ یہ میرا آخری الیکشن ہے،لانبی میں میں پرکاش سنگھ بادل کو چیلنج دے رہا ہوں،میں ان (بادل خاندان)کو سبق سکھانا چاہتا ہوں جنہوں نے پنجاب کو لوٹا ہے۔امرندر نے عام آدمی پارٹی کے کنوینر اور دہلی کے وزیر اعلی اروند کیجریوال کی اس الزام پر سخت تنقید کی کہ وہ پرکاش سنگھ بادل کو جتانے میں مدد کرنے کے لئے لانبی سے لڑ رہے ہیں۔امرندر نے کجریوال کو چیلنج کیا کہ وہ لانبی سے الیکشن لڑ کر دکھائیں۔انہوں نے کہا کہ کجریوال کو اپنی پوزیشن معلوم پڑ جائے گی کہ وہ کہاں کھڑے ہیں۔انہوں نے کسی بھی پارٹی کے ساتھ اتحاد کرنے کو مسترد کیا اور کہا کہ کانگریس صدر سونیا گاندھی وزیر اعلی کے عہدے کے امیدوار پر فیصلہ کریں گی۔