پاکستان میں اب بھی فوج اقتدار پر مسلط ہے : وی کے سنگھ
نئی دہلی18 ستمبر (ایس او نیوز؍آئی این ایس انڈیا ) مرکزی وزیر وی کے سنگھ نے پیر کو کہا کہ نئے وزیر اعظم کے طور پر عمران خان کے انتخابات کے بعد بھی پاکستان میں فوج کا ہی غلبہ ہے۔انہوں نے عمران خان کا نام لئے بغیر کہا کہ یہ دیکھنا ابھی باقی ہے کہ کیا وہ تبدیلی لا پائیں گے۔خارجہ وزیر مملکت سنگھ نے صحافیوں کو بتایا کہ پاکستان میں نئی حکومت کے قیام کے بعد بھارت ’ دیکھو اور انتظار کرو‘ کی پالیسی اپنا رہا ہے۔ پاکستان میں نئی حکومت بننے کے بعد سرحد پر دراندازی کے واقعات کے بارے میں پوچھے گئے ایک سوال کے جواب میں انہوں نے کہا کہ کیا آپ کو تبدیلی کی امید تھی؟ مجھے نہیں پتہ۔ان سب کے بعدبھی فوج حمایت کر رہی ہے۔ فوج کی اب بھی حکومت ہے؛ لہٰذا ہم انتظار کریں اور دیکھیں گے کہ چیزیں کس طرح بدلتی ہیں۔ وہ شخص فوج کے کنٹرول میں رہتا ہے یا اس کے کنٹرول میں نہیں رہتا ہے۔سنگھ نے کہا کہ پاکستان کے ساتھ مذاکرات اسی وقت ہوسکتے ہیں جب اس کے لئے ماحول دوستانہ ہو۔جب ان سے سوال کیا گیا کہ کیا بھارت کے ساتھ بات چیت کے لئے پاکستان کی جانب سے کوئی کوشش کی گئی ہے تو اس کے جواب میں انہوں نے کہا کہ بھارت کی پالیسی بالکل واضح ہے. بات چیت اسی وقت ممکن ہے جب ماحول دوستانہ ہو۔ سکھ یاتریوں کے لئے کرتارپور سرحد کھولنے کی خبروں کا ذکر کرتے ہوئے سنگھ نے کہا کہ بھارت کو راستہ کھولنے کے سلسلے میں پاکستان سے کوئی پیشکش نہیں ملی ہے ۔انہوں نے کہا کہ حکومت (پاکستان) کی جانب سے کچھ بھی نہیں آیا ہے۔ یہ مسئلہ طویل عرصے سے جاری رہا ہے۔ اگر اس ذیل میں کسی طرح کی کوئی اطلاع موصول ہوتی ہے تو ہم اس کی جانکاری دیں گے۔ اس سے قبل پروگرام سے خطاب کرتے ہوئے سنگھ نے کہا کہ بھارت کی سرحد منفرد ہے اور اسی وجہ یہ زیادہ محفوظ بنانے کے لئے ایک حل تیار نہیں کیا جا سکتا ہے۔