بنگلورو23اپریل(ایس او نیوز؍یواین آئی)پارلیمانی امور کے وزیرو بی جے پی کے سینئر لیڈر اننت کمار نے آج کہا ہے کہ کانگریس جس نے ملک میں ایمرجنسی نافذ کی تھی،کو ملک کی دستوری اتھارٹی اورجمہوریت پر سوال اٹھانے کا کوئی اخلاقی حق حاصل نہیں ہے ۔انہوں نے چیف جسٹس آف انڈیاکے مواخذہ کے لئے کانگریس کی جانب سے دی گئی عرضی کو نائب صدر جمہوریہ وینکیا نائیڈو کی جانب سے مسترد کرنے کا استقبال کرتے ہوئے کہا کہ کانگریس کو دستور اور جمہوریت پر سوال اٹھانے کا کوئی بھی حق نہیں ہے ۔ایسے قدم سے پارٹی نے یہ بتادیا ہے کہ 70سال کے باوجود اس نے ہنوز ملک کے دستور کے بارے میں کچھ بھی نہیں سیکھا ہے ۔انہوں نے کہا کہ ایسی حرکتوں میں کانگریس کے ملوث ہونے پر ہمیں مایوسی ہورہی ہے اور یہ اس کے ناقابل فراموش رویہ کو ثابت کرتا ہے ۔اس نے دستور کے خلاف ایمرجنسی نافذ کی تھی اور بڑے پیمانہ پر اس کی نکتہ چینی کی گئی تھی ۔اب عدلیہ کے خلاف ایسا قدم اٹھایا جارہا ہے جو ملک کے دستور کا ایک ستون ہے ۔