بنگلورو،21؍ستمبر(ایس او نیوز) شہر کے نئے اڈیشنل کمشنر آف پولیس کرائم الوک کمار نے آج اپنے عہدے کا جائزہ لے لیا۔ عہدہ سنبھالنے کے بعد اخباری نمائندوں سے بات چیت کرتے ہوئے انہوں نے کہاکہ شہر کی سنٹرل کرائم برانچ میں پچھلے چھ ماہ سے کئی معاملے بغیر نپٹائے پڑے ہوئے ہیں۔ فوری طور پر ان معاملوں کو نپٹایا جائے گا۔ انہوں نے کہاکہ ان معاملوں کو اس قدر سست رفتاری سے کیوں نپٹایا جارہاہے، اس سلسلے میں محکمے کے افسروں سے باز پرس بھی کی جائے گی۔

انہوں نے کہاکہ آنے والے دنوں میں سی سی بی کی طرف سے تمام معاملوں کو منظم طور پر طے شدہ رفتار کے ساتھ نپٹایا جائے گا اور جو بھی مقدمے تحقیق کے لئے آئیں گے ان کو انجام تک پہنچایا جائے گا۔ حال ہی میں شہر میں انڈرورلڈ مافیا کی طرف سے ریاستی حکومت کو غیر مستحکم کرنے کی مبینہ کوششوں کے متعلق ایک سوال پر الوک کمار نے کہاکہ اس معاملے کی سختی سے جانچ کی جائے گی اور اس میں شامل غنڈہ عناصر یا پیشہ ور مجرموں کی نشاندہی کرکے ان کے خلاف کارروائی کو آگے بڑھایا جائے گا۔

الوک کمار نے کہاکہ سی سی بی کو یہ ہدایت دی گئی ہے کہ سیاسی سرگرمیوں سے وابستہ غنڈہ عناصر پر سخت نظر رکھی جائے اور کسی بھی غیر قانونی سرگرمی میں اگر وہ ملوث ہوں تو ان پر بلامروت کارروائی کی جائے ۔ عہدہ سنبھالنے کے بعد الوک کمار نے پولیس کمشنر سنیل کمار سے ملاقات کرکے تقریباً آدھا گھنٹہ تبادلۂ خیال کیا۔